O narcosubmarino, que se resiste a saír, a vista de dron

Expectación por ver o batiscafo -o primeiro con capacidade transoceánica- incautado mentres segue a persecución do narco galego que escapou a nado

O remolcador Insuíña Rande, escoltado por unha patrulleira da Garda Civil e unha embarcación de Vixilancia Aduaneira, partiu á primeira hora desta mañá do porto de Aldán para ir ao encontro do 'narcosubmarino' localizado a pasada fin de semana en Punta Couso, e que quedou a unha milla do porto, enganchado a unhas redes, cando era remolcado na tarde noite deste luns.

Segundo informan fontes próximas ao operativo, o dispositivo non tivo o éxito desexado por agora. Está previsto que a iso das cinco da tarde culmine un novo intento de rescatar o narcosumbarino, que como se pode ver nas fotos facilitadas a Galiciapress desde o SUP está xa moi próximo á costa:

O navío está xa moi próximo á costa

Mentres tanto, segue a busca do galego que escapou a nado á costa tras o afundimento intencionado do batiscafo. Os seus compañeiros de travesía ecuatorianos pasarán pronto ao dispor do xuíz, pero o contacto local leva xa dous días escapado, o que apunta a que coñecía ben a zona de Aldán e poida que dispoña dalgún contacto alí para ocultarse.

O navío foi parcialmente reflotado este luns tras unha ardua xornada de traballo por parte dos mergulladores dos Grupos Especiais de Actividades Subacuáticas (GEAS) da Garda Civil, con axuda duns globos, e con apoio do resto de efectivos.

ENGACHADO A UNHAS REDES

A última hora da tarde comezouse o remolque arrastrando o artefacto pero, a unha milla do porto de Aldán, e debido a que os globos perderon aire, a que quedou enganchado nunhas redes e ás malas condicións do mar, houbo que cancelar a operación.

Por iso, as embarcacións que coordinan o traslado do 'narcosubmarino' saíron esta mañá desde o peirao de Aldán cara a ese punto, co obxectivo de repetir as manobras para reflotar o sumergible e retomar o seu remolque ata o porto.