O fracaso electoral de máis País en Galicia pon en dúbida a súa continuidade para as autonómicas de 2020

Moito terán que traballar os errojonistas para darlle continuidade ao seu proxecto en Galicia tras apañar  só o 1,5% dos votos a nivel galego, un resultado que a propia Bescansa ve decepcionante, aínda que apela á utilidade dos 3 escanos logrados no Estado para axudar a formar un goberno progresista.

Bescansa con Errejón e Carmena na noite electoral

A cabeza de lista pola Coruña de máis País ao Congreso, Carolina Bescansa, recoñeceu que agardaba uns resultados "mellores" en Galicia, onde a plataforma de Íñigo Errejón quedou relegada a unha posición residual ao recibir 22.474 votos, o 1,53% do total de sufraxios emitidos na Comunidade galega.

SEN PRESENZA EN LUGO E OURENSE
Bescansa, referente de máis País en Galicia, comunidade na que só presentaron candidatura pola Coruña e Pontevedra, ofreceu este luns declaracións aos medios para comentar os resultados das eleccións xerais do domingo que, para a cofundadora de Podemos, "demostran que foron un erro enorme".

Na comunidade galega, Máis País quedou moi lonxe de obter representación, a pesar de que as primeiras enquisas internas que barallaba o proxecto de Errejón apuntaban á posibilidade de lograr un escano pola Coruña, circunscrición pola que concorría Carolina Bescansa.

A 45.000 VOTOS DE LOGRAR O ESCANO
Foi precisamente en A Coruña onde lograron o seu mellor resultado con 12.389 votos (2,04% do total), aínda que a unha distancia de máis de 45.000 sufraxios do último escano repartido pola circunscrición coruñesa, que foi a parar ao BNG. En Pontevedra, onde Daniel Liceras figuraba como cabeza de lista, Máis País recibiu 10.076 votos (1,95%).

"En Galicia esperabamos uns resultados mellores, pero do que se trata é de desbloquar", sinalou este luns Bescansa, que apelou á "posición cualitativa" de máis País a nivel estatal "máis que á cuantitativa", pois a plataforma quedouse en tres escanos, dous deles obtidos en Madrid e o restante, en Valencia, onde concorrían en alianza con Compromís.

VALORACIÓN A NIVEL ESTATAL
"Imos tentar ser útiles que é o que necesita o país", incidiu a socióloga santiaguesa, que lamentou que a repetición electoral haxa suposto "a fragmentación do sistema de partidos" con "unha extrema dereita que hai un ano non existía" e que agora "vai tirar" da "dinámica" do resto de forzas.

Para Bescansa, os resultados das xerais "demostran" que era necesario formar goberno tras os comicios de abril. "Houbo un incumprimento que vai en contra dos intereses de Galicia e de España", apostilou.

"Agora o que toca é apoiar a formación de goberno de progreso e de cambio para empezar a poñer en pé as políticas que necesita a xente do país", aseverou Bescansa, que incidiu en que o obxectivo é "desbloquear a situación do país". "Se podemos axudar nesa dirección, bos resultados son", resolveu.