O rañaceos máis grande de España estará en Ourense, promete Jácome

O alcalde de Ourense propón construír un edificio de 300 metros e 80 plantas nos arredores da urbe, que sirva como atractivo turístico e albergue outra das súas grandes ideas: o centro de intelixencia artificial. Estaría en terreos da Deputación de Baltar, terreos que levan lustros parados por cuestións urbanísticas.

O Concello de Ourense propón construír un rañaceos de 80 plantas na coñecida como 'Finca Deputación', un terreo urbano propiedade da institución provincial que goberna o popular Manuel Baltar.

Diso informou o Consistorio nun comunicado remitido aos medios, no que asegura que este sería un "polo de atracción e impulso económico e unha infraestrutura de absoluta practicidad para espazo de servizos".

O Concello indicou que a actual cualificación prevé a construción de seis torres de 16 pisos de altura, 9.274 metros cadrados edificados en cada unha das torres, unha idea que, segundo apunta, "non seduce en absoluto" ao alcalde, Gonzalo Pérez Jácome.

UN "SUPER PARQUE" CON PISCINA CLIMATIZADA

Por iso, sinala que a idea que se está contemplando como unha posibilidade "factible" é a de "fusionar as seis torres nun gran rañaceos" de 80 plantas, cunha superficie construída de 55.600 metros cadrados. O resto do terreo, conforme indica, sería unha zona para facer un "super parque" así como un espazo destinado a equipamentos deportivos que inclúe unha piscina climatizada.

O Consistorio subliña que "esta idea supoñería ter o mesmo volume edificado, pero achegando un elemento diferencial e competitivo en España". Así, precisa que "na última planta estaría un miradoiro" e mesmo espazos destinados a un hotel.

O "MÁIS GRANDE" DE ESPAÑA
"Estariamos ante o rañaceos máis grande de España, con máis de 300 metros, e un dos cinco primeiros de Europa", apunta o Concello, que insiste en que este edificio supoñería "unha atracción de visitantes garantida".

O 80 POR CENTO DO DIÑEIRO SAIRÍA DO ERARIO PÚBLICO

Ademais, o Concello destaca que as plantas poderían acoller residencias, oficinas públicas como o centro de intelixencia artificial, outra das súas grandes promesas, oficinas administrativas da Xunta e o Concello. 

A administración local subliña que esta idea "sería unha aposta polo beneficio público". "Non estamos a falar de especulacións privadas, xa que o 80% do hipotético rañaceos sería de propiedade pública", indica o Concello, que tamén recoñece que "o custo" sería "lixeiramente superior" ao das seis torres pero "perfectamente aceptable para desenvolver o proxecto".