"Aquí non hai presos políticos, aquí hai delincuentes", vídeo do apaixonado discurso de Paco Vázquez que aplaudiu Feijóo

"Deixar a Guerra Civil nas bibliotecas, mirar para o futuro!". Esta é unha das acesas proclamas que lanzou Francisco Vázquez no seu discurso deste domingo, catro días despois do traslado do ditador Francisco Franco. O ex-alcalde herculino foi un dos organizadores de a concentración na Coruña, enfavor da Constitución e en contra da independencia de Cataluña, convocada en paralelo á marcha de Societat Civil Catalá en Barcelona.

Moi significativo politicamente é que nas primeiras filas estivese a aplaudir Alberto Nuñez Feijóo. O presidente da Xunta estivo arroupado por outros cargos do PPdeG, como Beatriz Mato, líder conservadora local. Vázquez agradeceu expresamente a súa presenza desde o estrado. 

É significativo porque durante lustros Paco Vázquez foi o gran referente do PSdeG, aínda que hai anos que non milita nos socialistas. Tamén porque nos últimos anos vinculóuselle con Cidadáns. De feito, compartiu un acto con Albert Rivera non hai tanto e rumoreouse que ficharía para algunha lista electoral laranxa, algo que non prosperou.

CLAVES DUN DISCURSO MOI APAIXONADO QUE SUSCITARÁ DEBATE 

Aínda que Vázquez leva bastante tempo afastado da primeira fila política e institucional -desde que deixou de ser embaixador no Vaticano-, en María Pita púidose ver a un político en plena forma, polo menos no que se refire á dialéctica mitineira. Algo que, sen dúbida, reactivará os vellos debates sobre o seu eventual reincoporación a algún partido.

O ex-socialista, coñecido por ser moi crítico con todos os nacionalistas periféricos, aplaudiu as liberdades da Constitución e alertou que  "novamente hai quen quere destruílas, desde a intolerancia, os que queren dividir aos españois, pola lingua que falan, polo lugar que naceron, xa abonda!".

"Aquí non hai presos políticos, aquí hai delicuentes", engadiu antes de insistir en que hai que previr a suposta indoctrinización nacionalistas nas escolas. 

"A NAI DE TODAS AS BANDEIRAS" EN RISTRE

Concluíu enarborando unha bandeira de España, "a nai de todas as bandeiras" que di inclúa á de Galicia e Cataluña. "Nesta bandeira  está a nosa honra da nosa nación, está a historia do noso país, a honra dos nosos antepasados", dixo antes de pechar o seu discurso cun "Viva a Constitución, Viva España!".