A ONCE é o cuarto empregador de toda España

O grupo ONCE fai balance e destaca o crecemento da facturación impulsada polo avance de Ilunión.

O presidente de ONCE, Miguel Carballeda, destacou as boas cifras do Grupo Social ONCE en 2018, cunha facturación superior a 3.000 millóns de euros, e subliñou que a entidade xerou 111.327 empregos para persoas con discapacidade nos últimos 18 anos.

Carballeda remarcou que son cifras positivas que perseguen un fin último, crear emprego para persoas con discapacidade "coñecedores de que un salario digno é a mellor maneira de inclusión posible". 

Neste sentido, nun arranque de século XXI marcado polas palabras crises e paro, a ONCE seguiu xerando empregos para persoas con discapacidade.

O Grupo Social ONCE  facturou por primeira vez na historia máis de 3.000 millóns de euros en 2018, grazas sobre todo ao aumento da comercialización de produtos de xogo, cun 8,5% máis en relación ao 2017, e ao incremento das empresas Ilunion, que creceron un 9,2%.

Segundo sinalou a entidade nun comunicado, durante 2018 impulsou o emprego para 11.937 persoas (11.571 con discapacidade) e realizou 1.033 contratos indefinidos a axentes vendedores da Organización. 

Desta maneira, o Grupo Social ONCE pecha cun persoal total de 71.393 traballadores e traballadoras, o 58% con discapacidade e 30.217 mulleres (42,3%).

O informe mostra a suma dun grupo que combina a sinerxia de tres áreas: a xestión de xogo responsable da ONCE, cuxos beneficios son o motor económico da axuda a persoas cegas; a formación, accesibilidade e inclusión laboral de persoas con discapacidade, a través da achega a Fundación ONCE; e a realidade de Ilunion, que xera valor aos seus clientes e emprego de calidade para persoas con discapacidade.

Con estes datos, segundo o informe elaborado pola consultora PwC para a Organización, a ONCE representa un 0,52% do emprego en España, é o cuarto empregador a nivel estatal e o primeiro en persoas con discapacidade; e significa, por nivel de facturación, o 0,27% do Produto Interior Bruto (PIB).

Cada área que compón o Grupo Social ONCE realizou unha destacada achega aos resultados en 2018, encabezados pola ONCE, cuxas vendas de produtos de lotería aumentaron un 8,5% ata os 2.160,9 millóns de euros, o que permite impulsar o investimento social e o emprego, garantindo o obxectivo de xogo responsable.

ILUNION

Ilunion, as empresas do Grupo Social ONCE, mantiveron en 2018 o seu tendencia alcista do últimos seis anos e melloraron un 9,2% a súa cifra de negocio, ata os 925,2 millóns de euros, impulsados polo comportamento positivo das divisións de servizos, máis a hostaleira e hospitalaria, que representan máis do 80% do negocio.