Detidos o futbolista galego Borja Fernández e o deportivista Iñigo López

Entre os detidos tamén se atopan o excentral do Real Madrid Raúl Bravo, presunto xefe da organización, e o futbolista Samu Saiz, que milita actualmente no Xetafe. As investigacións sobre os presuntos amaños afectarían os partidos das últimas xornadas da tempada que acaba de finalizar.

Borja Fernández, o día que anunciou a súa retirada

Terremoto no fútbol profesional español, deses que sacode o deporte ata os seus cimentos e que mesmo pode facer que caia. Esta mañá coñecéronse as detencións de varios xogadores e exjugadores de Primeira e Segunda División. Entre os arrestados atópanse Borja Fernández, futbolista galego que fai menos de quince días xogou o seu último partido como profesional vestindo a camiseta do Real Valladolid, e Iñigo López, que actualmente pertence á disciplina do Deportivo da Coruña e que en 2014 vestiu a camiseta do Celta de Vigo.

As detencións débense á implicación dos arrestados nunha suposta organización criminal dedicada ao amaño de partidos de fútbol a través das apostas deportivas, segundo a información facilitada pola Policía Nacional, a cargo da operación.

Ademais dos futbolistas anteriormente citados, tamén foron arrestados o excentral do Real Madrid, Raúl Bravo, retirado en 2017 e presuntamente o xefe da organización, o tamén exfutbolista malagueño Carlos Aranda, famoso por militar en máis dunha decena de clubs de Primeira e Segunda, o presidente da Sociedade Deportiva Huesca, Agustín Lasaosa, e Juan Carlos Galindo Lanuza, xefe do equipo médico do club aragonés. Tanto Borja Fernández como Raúl Bravo e Aranda coincidiron nas categorías inferiores do Real Madrid.

Mención especial tamén merece Samu Saiz. O xogador do Getafe é ata agora o futbolista máis novo de entre os detidos, ainda que dende o seu club aseguran que se atopa de vacicións. O pasado xaneiro regresou a España despois do seu paso polo Leeds United inglés. Antes, militara no Huesca, onde coincidiu con varios detidos.

A todos os detidos impútaselles pertenza a organización criminal, corrupción entre particulares e branqueo de capitais. A investigación desenvolveuna a Unidade de Delincuencia Especializada e Violenta (UDEV) e estase centrando nas últimas xornadas da tempada que acaba de finalizar.

Ata o momento non transcendeu se hai máis futbolistas ou personalidades do mundo do fútbol implicadas.

COMUNICADOS

Ante estes feitos, o Real Valladolid, equipo ao que pertencía o futbolista galego, emitiu un comunicado no que "rexeita calquera tipo de conduta ou comportamentos fraudulentos, denunciando a corrupción entre particulares, o branqueo de capitais, as organizacións criminais ou calquera tipo de condutas que orixinen ou poidan chegar a orixinar a distorsión e corrupción de calquera competición deportiva, manifestando a necesidade de que estas condutas sexan denunciadas, perseguidas e investigadas polos Tribunais, tendo como última instancia a defensa dos dereitos das persoas e institucións".

"Así mesmo, o Real Valladolid C. F., S.A.D. traballa en estreita colaboración coa liga de Fútbol Profesional e coas Forzas e Corpos de Seguridade do Estado para erradicar calquera tipo de conduta contraria ao ordenamento xurídico, dispoñendo no seo da súa organización dos controis e medidas de seguridade interna de investigación para a eliminación e denuncia de calquera tipo de conduta punible", anuncia a nota, onde reitera o "compromiso" do club para colaborar nas investigacións.

Pola súa banda, A Liga de Fútbol Profesional tamén emitiu un comunicado no que pon en valor ao "extraordinario labor" das Forzas e Corpos de Seguridade ao cargo da operación. Ademais, cita expresamente o partido que enfronto á SD Huesca e ao Gimnàstic de Tarragona, da tempada 17/18, como un dos partidos investigados e denunciados pola LFP, ademais doutras nove denuncias presentadas este curso.

O Deportivo da Coruña, club ao que pertence o detido Iñigo López, que xogou no Huesca durante a tempada 2017-2018, non se pronunciou polo momento.