Un "supergrupo" de golfiños nas costas galegas, preto de Ons (Vídeo)

"Un supergrupo de golfiños mulares de máis de 150 exemplares varias millas fóra da illa de Ons". Así describe o Bottlenose Dolphin Research Institute (BDRI) o sorprendente avistamento de mamíferos mariños esta semana fronte ás costas de Galicia.

Sorprendente porque aínda que estes golfiños non son raros nas augas galegas, si que é moi pouco habitual coincidir cun grupo tan numeroso. Habitualmente, os golfiños mulares nas rías adoitan moverse en grupos moito máis pequenos; de pouco máis dunha ducia, como máximo.

Os grupos de maior tamaño adoitan proceder de poboacións que viven máis mar dentro e que, ás veces, achéganse á costa atraídos pola abundancia de peixes cos que alimentarse.