Os traballadores de ambulancias encérranse nos hospitais e oficinas do Sergas
Aínda que o conflito enfronta directamente aos traballadores -cuxos sindicatos CIG, UXT e Comisións están unidos nas protestas- coa patronal galega, o Goberno quen ten a pelota no seu tellado.E é que a raíz do conflito está nos recortes.
Traballadores do sector de ambulancias encerráronse esta mañá en hospitais e oficinas SERGAS das sete cidades galegas. Os asalariados do transporte sanitario dan así unha volta de porca máis ás mobilizacións ao fío da súa folga en demanda dun "convenio xusto".
Peche en Pontevedra | CIG
Ata agora, os técnicos limitáronse a concentrarse diante dos centros sanitarios. Ademais, de 'acompañar' con concentracións e pitos os actos do presidente e outros mandatarios da Xunta .
Segundo fontes sindicais da CIG consultadas por Galiciapress, as concentracións teñen lugar ou en hospitais -como o Clínico de Santiago- ou nas sedes das xerencias do Sergas. No caso do hospital da Coruña, a Policía Nacional xa se presentou para desaloxalos, expulsando aos folguistas.
O SERGAS por agora non reaccionou publicamente ás protestas. Aínda que o conflito enfronta directamente aos traballadores -cuxos sindicatos CIG, UXT e Comisións están unidos nas mobilizacións- coa patronal galega, en realidade é o Goberno quen ten a pelota no seu tellado.
Encerro nun hospital de Vigo | CIG
E é que a raíz do conflito está nos recortes. A Xunta licitou os contratos de ambulancias no seu día con importantes rebaixas. As empresas acudiron e presentaron ofertas aínda máis baixas. O resultado é que hoxe din que non poden seguir prestando o servizo, ameazan con deixar de cumprir os contratos e durante anos negáronse a renovar o convenio, caducado en 2015.
Tras meses de protestas, os traballadores de ambulancias están a piques de entrar en folga indefinida. A Xunta reaccionou prometendo novos contratos con máis diñeiro e a patronal realizou algunha oferta na mesa de negociación, que os sindicatos valoraron positivamente. Con todo, as centrais insisten en que a última oferta é aínda "insuficiente", por non abordar aspectos como o suposto abuso de contratos en prácticas ou melloras en prevención de riscos laborais.
A folga -por agora a tramos, o presente convocado ata o día 10- está lastrada por servizos mínimos do 100%, pero causa atrasos en servizos como o traslado entre hospitais ou en levar pacientes dados de alta a casa. Se non hai acordo, converterase en indefinida a partir do día 20 deste mes.
Escribe o teu comentario