Couceiro celebra 50 anos de libros e historias

A histórica librería santiaguesa celebra o seu medio século de vida con diversas actividades ao longo de todo o mes.

A Praza Cervantes, onde se localiza a Librería Couceiro

Celso Emilio Ferreiro, Hemingway, Rosalía de Castro, Ana Maria Matute, García Márquez, Lorca, Julia Navarro, Shakespeare, …Todos eles teñen casa en Santiago de Compostela: baixo os teitos da histórica librería Couceiro, na Praza Cervantes.

Entre tantos libros e historias que encheron os andeis deste archiconocido establecemento santiagués, punto de encontro para todos os composteláns que buscan mergullarse nas letras, a librería celebra o seu 50 aniversario o próximo 9 de marzo, nunha celebración que contará con música e contacontos a partir das 12:15 horas.

‘Generalinhas’, ‘De Ninghures’ e  máis artistas amenizarán o evento con música e cancións pola mañá, mentres que pola tarde, a partir das 18:00 horas, os asistentes poderán gozar do poeta e conta contos Celso Fernández Sanmartín e da actriz e narradora Soledad Felloza.

MÁIS ACTIVIDADES

Para festexar o seu medio século de vida, Couceiro tamén organizou diversas actividades ao longo de todo o mes como encontros con escritores con alumnos de centros educativos de toda Galicia baixo o titulo ‘Libros: lectura e escritura en primeira persoa’. Ademais, celebrará unha xornada aberta ao público cun taller de escritura.

Do mesmo xeito, Couceiro anunciou que mentres duren as celebracións polo aniversario, os seus produtos contarán cun 5% de desconto “como agradecemento a todos eses clientes que nos axudaron a chegar ata aquí”.