"Seguimento total" da folga do transporte sanitario 21 ambulancias picadas en dous días

A Fundación Pública Urxencias Sanitarias de Galicia-061 informou de que un total de 21 ambulancias asistenciais de soporte vital básico sufriron picadas entre as 12,00 horas do martes e as 12,00 horas deste mércores con motivo das protestas dos traballadores para reclamar un novo convenio colectivo.

Folguistas diante dun dos vehículos pintados| @TESenloita

Por outra banda, os traballadores e os sindicatos insisten en que a folga continúa cun seguimento practicamente total. Advirten que de non mellorar  a patronal as súas propostas, o paro converterase en indefinido.

SABOTAXES POR TODA A XEOGRAFÍA GALEGA
Segundo informa o 061 a través dun comunicado, os incidentes foron rexistrados en medios de transporte sanitario con base en Vigo (4 unidades danadas), Redondela, Cangas do Morrazo (dúas unidades), Pontevedra, Oleiros, Silleda, Melide, Baiona, Negreira, Boiro, Lalín, Tui, Padrón, A Coruña, Ribeira e Betanzos.

A Fundación Pública Urxencias Sanitarias precisou que todos os vehículos foron substituídos no menor tempo posible e seguiron prestando asistencia sanitaria con normalidade.

Respecto diso, o 061 condenou "firmemente" as sabotaxes realizadas contra a rede de ambulancias e insistiu na necesidade dun comportamento "responsable" durante a terceira convocatoria de xornadas de paros, que comezou o pasado día 4 ás 00,00 horas.