Os PACs votarán luns o borrador proposto polo SERGAS

Os traballadores dos Puntos de Atención Continuada (PAC) teñen previsto votar o próximo18 de febreiro o borrador entregado na tarde do mércores polo Servizo Galego de Saúde (SERGAS) aos sindicatos.

Deste xeito, o comité de folga confirmou a Europa Press que sobre 900 traballadores dos PAC de Galicia --entre médicos e persoal de enfermería-- están chamados a votar o documento entre as 9,00 e as 12,00 horas nas diferentes áreas sanitarias.

En relación a iso, a integrante do comité de folga, Ana Boedo, manifestou a Europa Press que convocan a votación con urxencia porque o SERGAS fixou outra mesa sectorial sobre os PAC o luns pola tarde.

"Como poden dicir nunha primeira reunión, hai un ano, que non lles consta o contido dos nosos problemas? É unha primeira mala contestación", reprochou esta representante do comité para criticar que "agora non pode vir con esas présas".

Sobre o documento entregado este mércores aos sindicatos, que se comprometeron a ter en conta a opinión dos traballadores dos PAC antes de asinar nada, asegurou Boedo, o comité apunta que "perfilaron algún punto máis" en relación ao cómputo de xornada para que garanta a neutralidade no cálculo --que agora inclúe aspectos como o permiso de paternidade--.

Como novidade, Boedo trasladou que inclúe "a maiores" o 20% do complemento de nocturnidade e festividade que reclamaban, pero criticou que "o fan nuns prazos", a razón do 40% dese 20% a percibir en 2020 e o 60% en 2021. "Moitos xa estarán xubilados", concluíu.