(VÍDEO) A sanidade de Galicia une as súas forzas en vésperas da manifestación

Este domingo celebrarase en Santiago de Compostela unha manifestación en defensa da sanidade pública.

O próximo día 10 de febreiro celebrarase en Santiago de Compostela unha manifestación en defensa da sanidade pública. As rúas da capital galega acollerán a profesionais e usuarios do servizo sanitario galego que decidiron marchar xuntos para reivindicar unha mellora na atención sanitaria. Así, distintos organismos, como a plataforma ‘SOS Sanidade Pública’, que convoca o encontro, fretarán autobuses desde distintos puntos da comunidade para que aqueles que queiran participar na manifestación poidan acudir de forma conxunta.

A falta de poucos días para que se celebre esta concentración en defensa da sanidade pública, os traballadores de diversos PACs de toda Galicia mostraron publicamente o seu apoio á manifestación e ás reivindicacións do sector, que sente maltratado polas políticas de austeridade do goberno galego.

Lousame, A Pobra do Caramiñal, Lalín, Bertamiráns, Silleda, Rianxo…centenares de traballadores de toda Galicia piden que a Xunta atenda ás súas reivindicacións para poder prestar unha Atención Primaria efectiva e de calidade, poñendo fin á sobrecarga na atención, a precariedade laboral que sofre o sector, a falta de materiais ou a saturación que viven os servizos de urxencias. Esta manifestación chega ademais nun momento no que á Xunta ten varias guerras abertas, como a folga dos PACs, a do Servizo de Urxencias do CHUS ou a futura folga das ambulancias.