O ERE de Vodafone afectará tamén á “calidade” do servizo en Galicia

Así o enuncian os consumidores galegos, que alertan que o nivel de calidade do servizo da compañía estaba en “niveis mínimos” segundo os estudos de 2018.

Nun comunicado, a Asociación de Internautas (AI), a Asociación Prol Dereitos Civís, Económicos e Sociais (Adeces) e a Unión de Consumidores de Galicia (Ucgal) achacan a deterioración de calidade deste operador aos sucesivos ERE que levou a cabo a compañía desde 2013.

O expediente de 2013 afectou ao 21% (900 de 4.300 traballadores). Tras a fusión con Ono, en 2015 houbo outro ERE cun milleiro de empregados, o 16% do total. Agora, o novo proceso terá impacto no 23,5% do persoal, unhas 1.200 persoas.

Por todo iso, estas entidades reflexionan sobre que é "imposible" garantir uns niveis de servizos e atención apropiados cun recorte de 3.100 empregados en seis anos.

Nos últimos informes realizados en 2018, Vodafone estaba á cola en atención ao cliente, así como en asistencia técnica e comercial. Así mesmo, un estudo da Asociación de Internautas arroxaba o ano pasado que Vodafone contaba cunha calidade da internet móbil de 4,13 puntos, o peor posible.