Mesmo concellos do PP esixen á Xunta que mellore Atención Primaria

A moción do PSdeG insta a que se contrate a médicos substitutos e faga un informe de problemas estruturais dos centros de saúde

A Corporación Municipal do Concello de Ourense solicitou á Xunta de Galicia no pleno ordinario deste luns melloras no servizo de Atención Primaria da cidade a través da aprobación unánime dunha moción presentada polo PSdeG que inclúe tres peticións concretas.

Partido Popular, Democracia Ourensá, PSdeG e Ourense en Común votaron a favor da proposta socialista, na que se insta á Xunta de Galicia a que realice "un informe dos problemas estruturais dos edificios dos centros de saúde existentes" no Concello de Ourense co compromiso de "realizar os arranxos para poder manter as condicións necesarias para unha correcta atención sanitaria".

Así mesmo, a moción pide á Administración autonómica que garanta a "correcta Atención Primaria" no Concello de Ourense "mediante a contratación necesaria de substitutos facultativos de medicina xeral e, de ser o caso, de atención pediátrica, para poder manter o número de profesionais activos no centro de saúde segundo está planificado".

No seu terceiro punto, o pleno aprobou instar á Xunta a que chegue a un acordo co Goberno de España para "facilitar e axilizar os procesos de acreditación de prazas de novo ingreso á formación especializada en pediatría" e a "dotar dos recursos necesarios aos centros sanitarios e facultade de medicina da Universidade de Santiago de Compostela para que exista a mellor cobertura posible de todo o proceso formativo".

Neste sentido, a concelleira do PSdeG Carmen Rodríguez Dacosta subliñou na exposición da moción os "recortes sanitarios" do presidente do Goberno galego, Alberto Núñez Feijóo, desde a súa chegada á Xunta de Galicia, e concretou que a Atención Primaria recibe un "22 por cento menos de orzamento", ademais de acusar ao titular da Administración autonómica de "paralizar o plan de mellora da Atención Primaria".

"Desde 2009, o sistema público de saúde soamente contratou de maneira estable a menos dun 15 por cento dos titulados MIR, o que supón un dato preocupante. Unha cifra tan baixa resulta de xeito evidente insuficiente para cubrir as necesidades dun sistema que ten como hándicap o envellecemento da poboación, a cronicidade e a dispersión xeográfica", destacou.

COMISIÓN DE INVESTIGACIÓN EN MONTEALEGRE

Por outra banda, a Corporación Municipal ha aprobado por unanimidade a moción de Democracia Ourensá relativa á elaboración dunha Ordenanza Municipal que regule o uso dos vehículos de mobilidade persoal.

O grupo liderado por Gonzalo Pérez Jácome concreta na súa proposta que este regulamento debe incluír "todas as responsabilidades asociadas ao manexo dos mesmos e os espazos de utilización autorizados nas vías públicas".

Ademais, o pleno tamén aprobou a moción do Grupo Municipal de Democracia Ourensá relativa a instar á Xunta de Galicia á creación dunha comisión de investigación no Complexo Montealegre para obrigar á Fundación Diagrama a cumprir o convenio. Ourense en Común e PSdeG apoiaron a medida, mentres que os concelleiros do Partido Popular han votado en contra.