Os críticos poden deixar En Marea se non hai unha auditoría antes de proclamar os resultados das primarias

O resultado oficioso das primarias de En Marea, que dá a vitoria ao bando de Luís Villares, non afasta a En Marea do risco dunha escisión. En palabras do grupo crítico "Entre Todas abrirá un período de reflexión sobre o futuro do espazo de Unidade Popular, e non descarta tomar medidas legais".

A alianza de Podemos Galicia, ANOVA, Esquerda Unida e varias mareas (Compostela Aberta, Marea Atlántica, Ferrol en Común e outras) entende que as eleccións non foron xustas. Denuncian que "o reconto dos votos fíxose sen a presenza dos interventores de Entre Todas e as votacións non están auditadas, rexistrándose numerosas incidencias que impedieron o voto de moitas inscritas".  

Ante isto reclaman unha auditoría urxente dos comicios antes de "a proclamación definitiva dos resultados". O detalle de que se pida a auditoría antes de dar os resultados finais é moi importante.

O bando de Villares controla os órganos de En Marea, salvo o Consello Electoral, cuxo control non está claro do todo tras a expulsión de tres membros dos oficialistas, en teoría por acceder ao censo sen permiso. Se o bando de Villares non accede á auditoría, fai valer de novo o seu control dos resortes orgánicos e proclámase vencedor oficial sen auditoría, os críticos de David Bruzos interpretarían un paso máis na súa "xestión oscurantista" e terían así na súa man un causus belli para desatar a escisión de En Marea.