Máis diñeiro público para o hospital privado POVISA pero menos salario para os seus traballadores

O hospital privado recibirá máis diñeiro do Sergas fóra do concerto para reducir as listas de espera do Chuvi

A dirección do hospital privado Povisa de Vigo expuxo "reaxustes de salarios" aos traballadores ao argumentar que xa "cobran máis" que o persoal doutros centros privados e que esa situación "non se pode manter", segundo informou o comité de empresa de Povisa.

Tras manter unha reunión coa dirección do centro, o comité de empresa explicou que Povisa expúxolles a intención de elaborar "un convenio novo" para os profesionais que se incorporen a partir de agora a este hospital.

PEOR SITUACIÓN
A portavoz do comité de Povisa, María Xesús Neira, da CIG, sostivo que "os traballadores están fóra do acordo co Sergas", pois a súa situación non só non vai mellorar senón que "empeorará". "Eles van ter o seu concerto que non vai ser tan malo e nós imos estar máis precarizados", aseverou.

Segundo trasladou o comité, o director xeral de Povisa salientou que será necesario realizar "axustes" e que actualmente os traballadores "teñen moitos días libres por convenio". Respecto a este "novo convenio" para os novos empregados, a representante de CIG explicou que o sindicato se opoñerá e non o defenderá.

PROMESA DE MANTER O EMPREGO
"Isto só vai supoñer recortes prexudiciais para todos nós", manifestou Neira, quen destacou que mentres a empresa "terá os seus beneficios".

Pola súa banda, Ruth Vallejo, da coalición CXT-SGPS, apuntou que "a única maneira" de que Povisa "gañe máis" é a través de "recortes de dereitos e de condicións laborais". Deste xeito, sostivo que a empresa lles ha "prometido" que non haberá despedimentos pero que non llo cren porque lles deu "razóns" nestes últimos anos, lembrando a situación de celadores e persoal de limpeza despedido.

LISTAS DE ESPERA
Respecto ao acordo entre Povisa e o Sergas que librou ao hospital privado de entrar en concurso de acredores, o comité explicou que o programa de redución de listas de espera (PERLE) que en novembro e decembro permitiu a Povisa ingresar "500.000 euros cada mes" de diñeiro público para reducir a súa propia lista de espera, pasará a ser algo "permanente".

Por tanto, Povisa incorpórase "" á lista de centros privados --principalmente Vithas Fátima en Vigo e Domínguez en Pontevedra-- para diminuír a lista de espera do Chuvi. "Trátase dun traballo extra que se paga por fóra do concerto e non sabemos a cantidade que se abonará", destacou Xurxo Cabral, de CC.OO.

MÁIS DIÑEIRO PARA POVISA
Deste xeito, segundo fontes sanitarias do Chuvi consultadas por Europa Press, o hospital privado incrementa a cantidade de diñeiro público que recibe a cambio de realizar operacións da lista de espera da EOXI de Vigo e seguirá xestionando a súa propia lista de espera.

O comité informou de que na reunión deste venres explicáronlles que o acordo entre Sergas e Povisa "será ratificado" no Parlamento galego o próximo día 27 e pedíronlles "prudencia" ata esa data.

Desde Sanidade non se confirmaron as cantidades de diñeiro público ingresadas a Povisa este mes de decembro en concepto da medicación de alto impacto nin a cantidade que o Sergas recoñeceu como débeda pendente co centro privado por estes mesmos tratamentos.