Anova, Podemos Galicia e Esquerda Unida camiño de abandonar En Marea

Podemos, EU e Anova estudan abandonar o proceso ante a sospeita de que a nova plataforma favorece á candidatura de Luís Villares

As primarias de En Marea volven estar no aire tras a aplicación dun novo sistema de votacións que sementa serias dúbidas no sector crítico coa dirección, cuxa representación no comité electoral cualifica de "ilexítima" a decisión de convocar as votacións para esta fin de semana e pide a súa paralización ante os "problemas de seguridade" e "usabilidade" detectados na nova plataforma do proceso.

Este xoves, varios membros do comité electoral pertencentes ao sector crítico ofreceron unha rolda de prensa na que incidiron en que non aceptan o cesamento ditado por Garantías sobre tres persoas do comité acusadas de acceder ilegalmente ao censo, polo que nou recoñecen que estas fosen substituídas polos tres suplentes (afíns á dirección), aos que responsabilizan de dar luz verde á convocatoria das primarias, unha decisión que consideran "ilexítima".

Mentres os críticos do comité electoral piden a paralización das primarias, as direccións de Anova, Podemos Galicia e Esquerda Unida sopesan a posibilidade de abandonar o proceso electoral, ao que concorren baixo a candidatura 'Entre Todas'.

Estas organizacións cuestionan o sistema contratado pola dirección que encabeza Luís Villares e cren que a nova plataforma está orientada a favorecer os intereses da candidatura continuista. Unha das cuestións sobre as que dubidan é o elevado número de SMS necesarios para completar o proceso, ata 6 segundo algunhas fontes, o que entenden non promove precisamente a participación. 

Con todo, a postura entre os críticos non é unánime, pois algúns líderes, como Martiño Noriega, xa se pronunciou en favor de participar nas votacións.