Arrincan as oposicións para 241 prazas de médicos de familia

Silleda acolle esta fin de semana os exames do concurso oposición correspondente a 2018 para diferentes categorías nas que se ofertan 286 prazas --o 50% delas resérvanse para promoción interna--, 241 das cales son de médico de familia.

Nesta edición, segundo datos ofrecidos pola Consellería de Sanidade, foron admitidos 2.557 aspirantes para 286 prazas ofrecidas en cinco categorías.

Así, hai 1.010 candidatos admitidos na categoría de médico de familia (hai un total de 241 prazas), 774 para o grupo de xestión da función administrativa (18 prazas), 277 na de grupo técnico da función administrativa (nove prazas), 269 optarán ás de técnico superior en documentación sanitaria (11 prazas) e 227 para as de enxeñeiro técnico (sete prazas).

Dos 2.557 aspirantes, o 68,36 por cento son mulleres; o 41,9 por cento teñen menos de 40 anos e o 3,17 por cento veñen de fóra de Galicia.

Durante a xornada do sábado examináronse os aspirantes do grupo de xestión da función administrativa. Presentáronse 465 dos 774 admitidos.

O domingo examinaranse pola mañá os aspirantes ás prazas de médico de familia e enxeñeiro técnico. Pola tarde será a quenda dos candidatos ás categorías do grupo técnico da función administrativa e técnico superior en documentación sanitaria.

EXAMES DE TRES PARTES

As probas están compostas por tres exames de tipo test. A primeira parte é de lexislación xeral --excluídos os aspirantes admitidos de promoción interna--, a segunda está relacionada cos coñecementos específicos de cada categoría, e a terceira é acreditativa do coñecemento do galego, da que se exclúe a quen acredite ter o Celga requirido.

A Consellería de Sanidade lembrou que "en previsión das normativas de igualdade", facilitouse a execución das probas ás opositoras gestantes, mediante o desprazamento dunha delegación do tribunal aos centros sanitarios nos que estean ingresadas.

Por outra banda, detallaron que este proceso selectivo "incorpora varias medidas de seguridade" que permiten unha mellora do proceso.