Ancián faleceu despois de que o SERGAS non o derivase a un hospital

O home de case 90 anos caeu pero os médicos do PAC non viron pertinente levalo a un hospital, ao que acudiu polos seus propios medios dous días despois, pero xa era tarde

O Tribunal Superior de Xustiza de Galicia (TSXG) confirmou a sentenza que condena ao Servizo Galego de Saúde (Sergas) a abonar unha indemnización de 40.000 euros á muller e aos catro fillos dun home de 88 anos que faleceu en 2015 tras non ser derivado desde o Punto de Atención Continuada (PAC) do Carballiño (Ourense) ao servizo de Urxencias do Complexo Hospitalario Universitario de Ourense (CHUO).

Conselleiro de Sanidade

Segundo sinalaron os maxistrados na sentenza, que confirma o fallo do Xulgado do Contencioso-Administrativo número 2, o suxeito foi enviado ao seu domicilio tras sufrir unha caída que lle provocou hematomas na cabeza e non foi atendido no hospital ata dous días máis tarde.

"Non resulta indiferente ter a posibilidade de recibir atención médica permanente nun hospital durante esas 48 horas, coa posibilidade de administración de medicación que cohíbe a acción das plaquetas, que permanecer no seu domicilio cunha hemorraxia interna", destacou o TSXG.

TARDARON DOUS DÍAS EN FACERLLE UN TAC

Neste sentido, os xuíces subliñaron, en resposta ao recurso de apelación do letrado de la Xunta de Galicia, que "a ferida non debeu de ser tan leve nin tan superficial cando en TAC realizado dous días despois apreciouse hematoma subdural agudo".

"Os facultativos do PAC do Carballiño dispoñían doutros datos para tomar en consideración para que, ante a caída sufrida polo señor e o diagnóstico de TCE, houbesen de derivalo ao servizo de urxencias do CHOU para a práctica dun TAC e unha máis profunda asistencia, como a que se lle proporcionou 48 horas máis tarde, cando o propio paciente acudiu ao devandito servizo e foi adecuadamente atendido", destacaron na sentenza.

Os familiares do falecido reclamaban un aumento na indemnización, pero os maxistrados denegáronllo porque consideran correcto o baremo tido en conta polo xulgado de Ourense. As partes poden interpoñer recurso de casación contra a sentenza ante a Sala Terceira do Tribunal Supremo ou ante a Sala correspondente do Tribunal Superior de Xustiza de Galicia.