Os ecoloxistas sinalan os puntos nos que se "poden xerar desbordamentos"

Galicia conta con 7.085 quilómetros de canles "que poden xerar desbordamentos", segundo os datos do Ministerio de Agricultura, Pesca e Alimentación. As plataformas ecoloxistas advirten que pode darse "un final tráxico".

Canle dun río en Galicia

A asociación ecoloxista Arco Iris advirte que Galicia alberga 7.085 quilómetros de canles "que poden xerar desbordamentos", segundo datos do Ministerio de Agricultura, Pesca e Alimentación aos que se referiron nunha nota de prensa.

En concreto, a demarcación hidrográfica Galicia Costa ten 2.223 zonas inundables, mentres que Miño-Sil acumula ata 3.153. Nestas áreas, alertan os ecoloxistas, "o perigo para as poboacións lindeiras é unha realidade".

En vista destas cifras e do "final tráxico" ocorrido nas riadas de Baleares esta semana, Arco Iris fai fincapé na "infinidade" de antigas presas e saltos de auga en Galicia que se atopan en "abandono absoluto" e "carecen do máis mínimo mantemento".

"O mal estado ou a localización inadecuada destes elementos pode poñer en perigo a conservación de bens materiais e mesmo vidas humanas en casos catastróficos, porque a Xunta carece de calquera instrumento de planificación e prevención destes acontecementos", critica a asociación.

Todo iso, proseguen, "está a ter xa serias consecuencias" no impacto "crecente" do cambio climático sobre os ríos. Neste sentido, Arco Iris pon o foco nas riadas "que se produzan no futuro" polo quecemento global e que "deberían forzar" ao Goberno autonómico a elaborar documentos técnicos para "limitar no posible" os danos que poidan ocasionar.