A patronal pretende baixar ata 400 euros os soldos dos profesionais de ambulancia

As negociacións do novo convenio permanecen estancadas a pesar de que se iniciaron fai xa tres anos.

Profesionais das ambulancias manifestandose

Os profesionais das ambulancias do área sanitaria de Santiago retomarán o vindeiro xoves 10 de outubro as mobilizacións para esixir avances nas negociacións do novo convenio colectivo de ambulancias, bloqueado, segundo reza o comunicado emitido polo sector, “pola actitude inmovilista da patronal”. Desde fai tres anos o sector vive pendente dunhas negociacións estancadas e os Técnicos en Emerxencias Sanitarias realizarán unha concentración diante do hospital provincial e máis tarde iniciarán unha manifestación ata o 061.

Deste xeito reiniciaranse as protestas coas que os profesionais piden “un convenio que permita recuperar dereitos e salarios”. “En rexeitamento polas pretensións dalgunhas empresas de aplicar modificacións substanciais nas condicións laborais que supoñerían rebaixas salariais de case 400 euros ao mes”, aclaran desde o sector.

Do mesmo xeito, o comunicado emitido incide en que estas modificacións supoñen “máis traballo e menos días libres”, polo que consideran que teñen que mobilizarse para esixirlle ao SERGAS “que cumpra co establecido nos contratos”.