O antigo persoal da fábrica de armas piden ao Goberno que evite o desmantelamento

Extraballadores da fábrica de armas da Coruña pediron ao delegado do Goberno en Galicia, Javier Losada, que o Ministerio de Defensa evite o desmantelamento da factoría, despois de que en agosto iniciase o expediente de reversión do contrato das instalacións por falta de pagamento do canon que Hércules de Armamento tiña que abonar ao Estado.

Fixérono nun encontro co delegado do Goberno, ao que asistiu tamén o deputado socialista no Congreso Ricardo García Mira, segundo informa a Delegación do Goberno.

Sobre o contido da reunión, indica que "serviu para avaliar os últimos pasos dados respecto ao proceso de recuperación da factoría por parte do Ministerio de Defensa, así como da propia diversificación industrial da fábrica".

Ademais, os extraballadores trasladaron a Javier Losada a súa preocupación polo posible desmantelamento das instalacións por parte dos seus xestores. Ante iso, o delegado do Goberno comprometeuse a estar "vixiante" e a trasladar ao Ministerio de Defensa as inquietudes dos exempregados para que se faga "o control" pertinente.

Os extraballadores da fábrica de armas mantiveran concentracións, o último de venres de cada mes, ante a Delegación do Goberno para esixir unha solución para esta instalación. No encontro, o delegado do Goberno agradeceulles que, tras cinco anos, puxesen fin a estas protestas coincidindo coa convocatoria dunha reunión entre as partes.