Atopado en bo estado o octoxenario desaparecido o martes en Arzúa

O home de 88 anos de idade, Ricardo Veiga, que faltaba do seu domicilio desde o mediodía deste martes en Arzúa (A Coruña), foi finalmente localizado san e salvo polos servizos de emerxencia que participaban no dispositivo de procura, minutos antes das 21,00 horas.

Segundo informaron fontes do servizo de emerxencias do 112 Galicia, o home estaba aparentemente en bo estado de saúde. A Garda Civil comunicou ao 112, minutos antes das nove da noite do martes, que fora localizado o home, consciente e, aparentemente, en bo estado, aínda que con síntomas de fatiga.

Foi localizado moi preto do seu domicilio, nunha leira situada ao carón da estrada da Mota. En todo caso, nada máis ser localizado, unha ambulancia do 061 desprazouse ata o lugar.

Ao fío das 16,30 horas, familiares do octoxenario comunicaran a desaparición do home ao 112 Galicia, indicando que faltaba da casa desde o mediodía e que tiña problemas de saúde. Enseguida, os xestores do CIAE puxeron en alerta á Garda Civil que, desde ese momento, coordinou o operativo de busca.

Familiares, veciños, Bombeiros de Arzúa, efectivos de Protección da localidade, de Boimorto e a Unidade de Cans de rescate de Protección Civil de Padrón formaron parte do dispositivo de procura. Tamén, un equipo de drons da Axencia Galega de Emerxencias (AXEGA) formou parte do operativo que coordinou a Garda Civil.