Un Colexio de Médicos alerta dos insustentables problemas na atención primaria do SERGAS
Precariedade laboral, falta de prazas de MIR e de cobertura das baixas e as vacacións. Este é o cóctel de problemas que está a deteriorar a atención primaria no SERGAS, segundo o Colexio de Médicos de Pontevedra.
O Colexio Oficial de Médicos de Pontevedra denunciou que a "falta dunha adecuada planificación" por parte da Consellería de Sanidade xera "cada ano" unha "sobrecarga asistencial insustentable" para os profesionais de atención primaria.
"Non se cobren baixas nin vacacións e búscase a solución en prolongacións de xornada ante a ausencia de profesionais nas listas de contratación", criticou o Colexio nun comunicado.
Ademais, asegurou que esta problemática está "en parte condicionada" por unha política "errónea" de xubilacións "forzosas", pola "insuficiente" creación de prazas MIR para formar médicos de familia e pediatras, así como por unha "crecente precariedade laboral" do colectivo.
Así as cousas, o Colexio de Pontevedra insisten en que os principios que rexen a atención primaria están "en claro perigo". "E, sen eles, perde o seu valor e influencia no bo funcionamento do sistema público de saúde galego", engade.
Escribe o teu comentario