Os policías xemelgos sospeitosos de matar a un compañeiro seguen libres, pero deben pagar máis fianza

Os xemelgos investigados polo homicidio do policía Celso Blanco, achado morto no seu despacho da comisaría da cidade o 9 de abril de 2016, continuarán en liberdade vixiada - -situación na que se atopan desde o pasado mes de xaneiro tras abonar unha fianza de 60.000 euros cada un-- se abonan outra de 40.000, xa que a maxistrada Eva Armesto decidiu elevar a fianza ata 100.000 euros.

Ademais, ambos deberán comparecer no xulgado de instrución número 3 de Ourense diariamente e foilles prohibida a saída do territorio estatal. Teñen a próxima semana para depositar os 40.000 euros de fianza que evitarían a súa entrada en prisión.

Así o comunicou este venres a xuíza instrutora despois de ser completadas as comparecencias das partes o pasado xoves e tras varias horas de declaracións dos investigados durante a xornada do mércores, na que estes decidiron responder as preguntas realizadas tanto polo seu letrado como por Fiscalía, a maxistrada e a acusación particular.

Así as cousas, a xuíza decidiu compartir a decisión que demandaban tanto o Ministerio Fiscal como o letrado da defensa, que non vían razóns suficientes para que os xemelgos ingresasen en prisión de forma preventiva ao non darse os requisitos necesarios para iso. A acusación si avogou pola entrada de ambos no cárcere.