Segue baixando o paro en Galicia grazas aos servizos e á construción

|

O desemprego segue reducíndose no país a un ritmo de máis do 10% interanual. Pontevedra, a provincia con máis músculo turístico no verán, lidera a caída en Galicia.


SERVICIODEEMPREGO


O número de parados rexistrados nas oficinas dos servizos públicos de emprego en Galicia (antigo Inem) baixou en xuño en 6.631 desempregados respecto ao mes anterior, o que supón un descenso do 3,75%, por encima da media, que foi do 2,8%.


Variación do paro en xuño en Galicia
CAÍDA DUN 10% INTERANUAL

En relación con xuño de 2017, o número de parados baixou na comunidade galega en 19.600 persoas, un 10,33%, de modo que o total sitúase en 170.065, segundo os datos que publica este martes o Ministerio de Traballo, Migracións e Seguridade Social.

Deste xeito, a diminución do paro en comparación con maio en Galicia foi a novena por comunidades en termos relativos e a sexta en valores absolutos (despois de Cataluña, Andalucía, Madrid, Castela e León, Comunidade Valenciana).

MÁIS PARO ENTRE AS GALEGAS QUE ENTRE OS GALEGOS
Por provincias, a maior redución, tanto porcentual como absoluta, foi a de Pontevedra, cunha caída do 4,83% na cifra de desempregados: 3.341 menos. En Lugo baixou un 3,33%, o que significa que son 572 persoas menos en paro; na Coruña un 3,24%, 2.288 menos; e en Ourense un 2,17%, 430 menos.

O desemprego galego repártese entre 98.260 mulleres e 71.805 homes. Do total, 7.771 parados son menores de 25 anos e os outros 162.204, do resto de idades.

CAE EN TODOS OS SECTORES
Por sector de actividade, a maior parte lévanllo os servizos, con 114.176 desempregados, que son 4.682 menos que durante o mes anterior. A seguinte diminución máis elevada rexistrouse en construción, con 702 parados menos, ata 15.306.

Mentres, a industria baixou en 573 o número de persoas en paro, ata 19.215, e a agricultura fixo o propio pero en menor contía, con 238 desempregados menos, ata 6.174 parados.

Pola súa banda, o colectivo sen emprego anterior contabiliza 15.194 desempregados, 436 menos que un mes atrás. Deles, 1.299 teñen menos de 20 anos, 5.180 son homes e case o dobre, 10.014, mulleres.

Entre estranxeiros, o paro afecta na comunidade galega a 9.502 persoas, 395 menos que en maio (-3,99%) e 540 menos que en xuño do exercicio anterior (-5,38%). Por zona de orixe, son 5.716 extracomunitarios e 3.786 comunitarios.

No que respecta a sector de actividade, os estranxeiros que se atopan en desemprego distribúense entre os 5.370 dos servizos, 2.283 sen emprego anterior, 703 na agricultura, 595 na construción e 551 na industria.

BAIXAN OS DEMANDANTES NON OCUPADOS
Os demandantes de emprego foron 228.197 en Galicia, deles 28.504 ocupados, 16.652 que indicaron na súa solicitude condiciones especiais de traballo e 183.041 non ocupados.

En evolución intermensual, os demandantes de emprego non ocupados baixaron en 5.458, un 2,9%, mentres que foron un 10,52% menos que un ano atrás (21.524 persoas menos).

Pola súa banda, no que ten que ver con contratos, 103.670 en xuño, foron 7.481 máis que en maio (+7,78%) e 57 máis que no mesmo mes do ano anterior (+0,06%).

Por tipo de contratación, 95.387 foron temporais (+8,45% mensual e -1,05% interanual) e 8.283, indefinidos (+0,57% intermensual e +14,8% anual). Por provincias, asináronse 42.725 en Pontevedra (+3,82% mensual), 42.259 na Coruña (+10,39%), 11.053 en Lugo (+7,45%) e 7.633 en Ourense (+18,05%).

Así as cousas, no acumulado, a comunidade presenta un 90,58% de 506.861 contratos temporais (un total de 459.138) e un 9,42% indefinidos (47.723).

DATOS ESTATAIS
No conxunto estatal, o número de parados rexistrados nas oficinas dos servizos públicos de emprego (antigo Inem) baixou en xuño en 89.968 desempregados respecto ao mes anterior (-2,8%), o seu menor descenso neste mes desde 2011.

O volume total de parados alcanzou a finais de xuño a cifra de 3.162.162 desempregados, o seu nivel máis baixo desde decembro de 2008. Desde os máximos alcanzados en febreiro de 2013, o paro reduciuse en máis de 1,9 millóns de persoas.

Dentro da serie histórica comparable, que arrinca en 1996, a evolución do paro nos meses de xuño adoita ser á baixa, salvo en 2008, cando subiu en algo máis de 36.000 persoas. Así, en 22 dos 23 xuños da serie rexístranse descensos do desemprego, fronte a un mes de aumento.

A baixada de xuño deste ano, coa que se encadean nove meses de retrocesos consecutivos, é inferior á rexistrada en 2017 (-98.317 desempregados) e aos descensos experimentados en 2016 (-124.349), 2015 (-94.727), 2014 (-122.684) e 2013 (-127.248), pero supera as caídas rexistradas entre 2009 e 2011. En total, o de xuño deste ano foi o sétimo maior descenso da serie.

En termos desestacionalizados, o paro baixou en xuño en 15.865 persoas.
Nos últimos doce meses, o desemprego reduciuse en España en 200.649 desempregados (-6%).

O paro diminuíu en xuño en todos os sectores menos na agricultura, onde subiu en 2.573 persoas. O maior recorte correspondeu ao sector servizos que, ante as contratacións de verán, reduciu o desemprego en 66.698 desempregados. Séguenlle construción (-9.407 parados); industria (-9.123), e o colectivo sen emprego anterior (-7.313 parados).

Pola súa banda, o número de contratos rexistrados durante o mes de xuño foi de 2.055.762, cifra un 1,6% inferior á do mesmo mes de 2017.

En xuño de 2018 rexistráronse 192.972 contratos de carácter indefinido, o 9,39% do total, cun incremento do 15,9% sobre igual mes do exercicio anterior.

O SECTOR SERVIZOS LIDERA Os DESCENSOS
O paro baixou en xuño en ambos os sexos, aínda que algo máis entre os homes. Así, o desemprego masculino retrocedeu en 51.788 desempregados (-3,8%) e o feminino en 38.180 paradas (-2%), situándose o total de mulleres en paro en 1.866.810 e o de homes, en 1.295.352.

O paro diminuíu en xuño en todos os sectores menos na agricultura, onde subiu en 2.573 persoas (+1,7%). O maior recorte correspondeu ao sector servizos que, ante as contratacións de verán, reduciu o desemprego en 66.698 desempregados (-3%). Séguenlle construción (-9.407 parados, -3,3%); industria (-9.123, -3,2%), e o colectivo sen emprego anterior (-7.313 parados, -2,5%).

Por idades, o desemprego retrocedeu en 16.882 persoas entre os menores de 25 anos (-6,6%) e baixou en 73.086 persoas entre os maiores da devandita idade (-2,4% respecto de maio).

BAIXA EN TODAS As COMUNIDADES
Pola súa banda, a poboación estranxeira recortou o seu número de parados no sexto mes do ano en 8.507 desempregados respecto de maio (-2,2%). En total, os inmigrantes en paro sumaban ao finalizar o mes pasado 379.875 desempregados, cun descenso de 14.253 parados (-3,6%) respecto de xuño de 2017.

O desemprego baixou en xuño en todas as comunidades autónomas, lideradas por Cataluña (-15.376 parados), Andalucía (-10.493) e Madrid (-9.713).

Por provincias, o paro baixou en 48 delas, encabezadas por Madrid (-9.713 desempregados), Barcelona (-8.502) e Cádiz (-6.467), e subiu en catro, especialmente en Huelva (+3.861 parados).

AUMENTAN OS CONTRATOS FIXOS
Pola súa banda, o número de contratos rexistrados durante o mes de xuño foi de 2.055.762, cifra un 1,6% inferior á do mesmo mes de 2017.

En xuño de 2018 rexistráronse 192.972 contratos de carácter indefinido, o 9,39% do total, cun incremento do 15,9% sobre igual mes do exercicio anterior.

Dentro dos contratos fixos, 113.690 foron a tempo completo, un 14,8% máis que en xuño de 2017, e 79.282 foron a tempo parcial (+17,6%).

No sexto mes do ano realizáronse máis de 1,8 millóns de contratos de carácter temporal, dos que o 25,4% eran de obra ou servizo a tempo completo e o 27,1% eventuais por circunstancias da produción, tamén con xornada completa. Pola súa banda, os contratos temporais con xornada a tempo parcial supuxeron o 32,7%.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial
Powered by Bigpress