'Rías Baixas, Costa da Fariña', campaña retirada tras polémica

Corre Galicia o risco en converterse en sinónimo de terras de narcotráfico? Iso parece ao fío da campaña publicitaria dun concello leonés, que retirou os anuncios dunha excursión tras as queixas da Deputación de Pontevedra.

Cartel da excursión /@MartinARceJ

O concello leonés de Camponaraya, na comarca do Bierzo, retirou os carteis nos que publicitaba unha viaxe ás 'Rías Baixas, Costa da Fariña' despois de que a Deputación de Pontevedra trasladáselle o seu enfado por esta campaña "inxusta e pouco apropiada".

Esta semana o Partido Popular fíxose eco desta promoción e este martes cando o goberno provincial trasladou a súa queixa ao concello leonés que este mércores procedeu á retirada da publicidade.

O Concello de Camponaraya promoveu unha viaxe para a súa veciñanza á provincia de Pontevedra tal e como organizan todos os anos. No itinerario, que terá lugar a comezos de xullo, está previsto un percorrido por Cambados, Combarro, A Barosa e o Pazo de Rubiáns. Segundo indicaron por parte do goberno do municipio do Bierzo, a xestión da viaxe corre a cargo dunha empresa que "desacertadamente" empregou o lema para a súa promoción.

Deste xeito, o goberno do municipio do Bierzo insistiu en reiterar que na súa páxina web anunciaron a "viaxe a Galicia" e que o lema escollido pola empresa non é adecuado para dar a coñecer esta zona á que acoden desde hai anos.

Para a Deputación de Pontevedra aínda que o lema aludía ao éxito dunha serie televisiva, podía vincular a marca 'Rías Baixas', que promove a institución provincial, "coa triste época pasada do narcotráfico na comarca do Salnés".

Con todo, a institución provincial mostrouse satisfeita polo entendemento co goberno local de Camponaraya.