"Estamos fartas de ser asasinadas"
Desde o luns sucedéronse as convocatorias por todo o país, con ao redor de 25 concentracións en diferentes localidades en repulsa ao presunto asasinato de Magdalena Moreira Alonso
A Batukada Feminista puxo o ritmo a consígnalas | Imaxe: Eva Neira Carballo
O achado de dous corpos nun domicilio o pasado 18 de xuño na parroquia de Chenlo, no Porriño, decretou a Alarma Feminista, unha chamada de atención entre o movemento feminista para dar resposta na rúa a crimes machistas.
Desde o luns sucedéronse as convocatorias por todo o país, con ao redor de 25 concentracións en diferentes localidades en repulsa ao presunto asasinato de Magdalena Moreira Alonso. En Compostela, o punto de encontro foi a Praza 8 de Marzo, lugar simbólico para o feminismo na capital. Desde pouco antes das 20.00h as asistentes foron chegando á praza, onde se repetiron consignas como "O machismo é terrorismo" ou "Basta xa, nin unha máis. Non queremos nin unha menos".
A concentración trasladouse ao paso de peóns de Porta do Camiño, onde pararon o tráfico ao ritmo da Batukada Feminista e gritando "Estamos fartas de ser asasinadas", chamando a atención de condutoras e viandantes. A marcha continuou sumando persoas de camiño á Praza de Cervantes, onde finalizou o acto entre aplausos tras a lectura dunha carta dunha persoa próxima a Magdalena Moreira. Entre as asistentes atopábanse a escritora e activista Luz Fandiño e a portavoz nacional do BNG Ana Pontón.
Escribe o teu comentario