Os informes sobre a mina de Touro son negativos por agora e a Xunta di que non a aprobará con "informes desfavorables"

O Goberno segue nadando entre dúas augas na polémica da mina de Touro - O Pino. Por unha banda deféndea, asegurando que non hai perigo para o Ulla, e por outro recoñece que non poderá saír adiante con"informes desfavorables", como os que hai sobre a mesa ata agora. De paso, responde as críticas sobre a cobertura da TVG atacando a Podemos.

Conde no Parlamento

O conselleiro de Economía, Emprego e Industria, Francisco Conde, insistiu en que as análises de Augas de Galicia descartan que a Mina de Touro afecte o río Ulla e acusou á oposición de tentar "alarmar" á cidadanía.

Francisco Conde pronunciouse deste xeito en resposta a unha pregunta formulada no pleno da Cámara galega polo deputado do BNG Xosé Luís Rivas 'Mini', quen lembrou a multitudinaria asistencia á manifestación convocada en Santiago de Compostela en contra deste proxecto mineiro e emprazou á Xunta a "tomar nota".

A XUNTA DI QUE A OPOSICIÓN ALARMA SEN DATOS

Respecto diso, o conselleiro acusou aos grupos da oposición de "pretender xerar alarma social" ao trasladar "desinformación" sobre este proxecto mineiro. "As analíticas de Augas de Galicia descartan calquera tipo de afectación ao Ulla e, trasladar calquera outra cousa é pretender confundir sobre este tema", indicou.

Así mesmo, Conde insistiu en que a Xunta non aprobará ningún proxecto se "hai informes desfavorables" e se a "declaración de impacto ambiental" tampouco o aconsella. "Lamento que cando falen de minería fágano desde a ideoloxía. Así é moi difícil falar seriamente", sinalou.

O certo é que os informes dos técnicos da Xunta que se coñecen ata agora son moi desfavorables, pois varios departamentos atopan omisións e problemas serios no proxecto presentado pola empresa. Son informes non vinculantes, pero deben ser claves para a aprobación, ou non, da Declaración de Impacto Ambiental, imprescindible para que Atalaya Minning e Cobre San Rafael sigan adiante co seu proxecto.

CRÍTICAS Á INFORMACIÓN SOBRE A MANIFESTACIÓN

Por outra banda, na sesión plenaria, a deputada de En Marea Ánxeles Cuña denunciou a cobertura informativa realizada pola CRTVG da manifestación ao asegurar que non se introduciron imaxes nas que se reflectise a "multitudinaria afluencia" e limitouse a dar a opinión da Xunta sobre o proxecto.

Estas acusacións foron rexeitadas polo vicepresidente da Xunta, Alfonso Rueda, quen considerou que En Marea crítica toda información que se estea contada como "exactamente" esta formación "quere".

Así, tras atribuír a cobertura á "liberdade dos medios" e ao "criterio" dos profesionais, o vicepresidente sacou diversas informacións con críticas dos profesionais da información para Podemos.