​Alertan de máis agresións ao persoal sanitario e piden que a Xunta tome medidas reais

Fronte a “política escaparate á que tan afeccionados son os xerarcas do Sergas”, ASMIG reclama asistencia xurídica para todos os agredidos.

A Asociación de Médicos Interinos de Galicia (ASMIG) denuncia que as agresións ao persoal sanitario cuadriplícanse en Galicia. Fano tirando de cifras oficiais, do Ministerio de Sanidade, que indican que a taxa de agresións en Galicia en tan só un ano (2016-2017) pasou do 0,22 ao 0,94.

Ante esta situación, o colectivo cre que a figura do interlocutor -creada pola Xunta para abordar este problema- non foi máis que unha nova demostración da “política escaparate á que tan afeccionados son os xerarcas do Sergas, xa que carece de calquera aplicación práctica”.

A queixa pública prodúcese un día despois de que se coñecese que un médico de Toledo foi agredido cunha barra de ferro, quedando en estado crítico. ASMIG lembra que o 65 por cento dos médicos españois aseguran ser agredidos no exercicio da súa profesión. A asociación esixe á Xunta que dea asistencia legal, a través da Asesoría Xurídica do Sergas, a todos os que se atreven a denunciar estes casos.