A veciñanza de Coruxo concéntrase para recuperar o seu servizo de pediatría
Segundo as asociacións o servizo de pediatría, que atende a "máis de mil nenas e nenos" das parroquias de Saiáns, Oia, Comesaña e Coruxo, é necesario para "dar resposta" a unha das áreas con poboación máis nova do concello
A Asociación de Veciños de Coruxo concentrouse este martes ás 9.00h xunto coa Asociación de Nais e Pais dos colexios da área sur do concello de Vigo, a Asociación de Veciños de San Miguel de Oia e a de Saiáns para denunciar o peche de pediatría no Centro de Saúde de Coruxo.
Segundo as asociacións o servizo de pediatría, que atende a "máis de mil nenas e nenos" das parroquias de Saiáns, Oia, Comesaña e Coruxo, é necesario para "dar resposta" a unha das áreas con poboación máis nova do concello, segundo expoñen, e que cobre "unha zona suficientemete frande como para ter en conta a súa importancia".
A veciñanza de Coruxo decidiu pedir unha reunión con responsables da Xerencia da área Sanitari de Vigo ante as sospeitas do peche de pediatría -declaran que percibiron limitacións na axenda médica, non renvación de contratos do persoal...-, e no encontro do pasado 4 de xuño, segundo expoñen nunha carta dirixida ao Valedor do Pobo, "déusenos a entender de forma subrepticia que o peche deste servizo era unha decisión firme e inminente".
Demandan a recuperación do servizo de pediatría, xa que, en caso contrario, as persoas usuarias serían dirixidas a o Centro de Saúde de Navia, "xa saturado pola recente centralización de servizos". Outra desvantaxe sería o acceso ao centro de saúde. Segundo a Asociación de Veciños de Coruxo, o traslado a Navia "implicaría grandes dificultades para os residenes en Oia e Saiáns, que non terían transporte urbano directo cando na actualidade poden chegar en menos de 10 minutos coa liña 11 do autobús".
Escribe o teu comentario