Esixen unha investigación a Galaria tras negarse a realizar tacs a pacientes de oncoloxía

O pasado martes a empresa pública Galaria "se negou a facer as probas de radioloxía que necesitaban 14 pacientes, algúns deles con cancro e xa citados para acudir á consulta a próxima semana" no Hospital Álvaro Cunqueiro de Vigo. Esta é a situación que describe a Delegación en Galicia da Confederación Estatal de Sindicatos Médicos (CESM), que esixe unha investigación para aclarar este "lamentable" feito. 

O delegado sindical de CESM na área Sanitaria de Vigo, Manuel Neto, cualificou a negativa de Galaria de "asunto grave" que afecta á dignidade e á atención dos pacientes. Segundo a información da que dispoñen, 14 tacs estaban programados para o martes, pero "a Dirección Técnica de Galaria ordenou ao radiólogo encargado de levala a cabo que non fixese esas probas e que se dedicase a facer resonancias magnéticas", explica a confederación nun comunicado. 

Ante isto, a radióloga do Chuvi "informou á subdirectora de procesos de soporte da xerencia, quen deu a orde de levar os volantes" a Galaria, pero a súa directora técnica "negouse a recepcionar os volantes e a realizar as probas", segundo CESM. Ao fío do comunicado do sindicato, finalmente levaron a cabo as probas "a dous pacientes que estaban presentes e anuláronse as outras 12". 

A organización sindical cualifica de "intolerable" esta actuación, e lamenta que o Sergas faga "oídos xordos" ante o "conflito existente entre Galaria e o Servizo de Radioloxía do Chuvi" . Demandan a integración por completo de Galaria no Sergas para evitar "insubordinacións e bicefalias".