Comeza a gravación de 'Port', o primeiro programa conxunto das televisións intercélticas

Terceira edición de Port 

Galicia acolle durante estes días a gravación do primeiro programa das televisións de todo o ámbito intercéltico. Trátase de 'Port', un viaxe musical que se emitiu durante tres tempadas en Escocia e Irlanda e que nesta cuarta edición, froito da colaboración entre as diversas televisións rexionais europeas, dá o salto a Bretaña, Asturias e Galicia a través da TVG.

A fórmula do programa consiste en que dúas coñecidas cantantes e multi-instrumentistas de música celta, a escocesa Julie Fowlis e a irlandesa Muireann Nic Amhlaoibh, percorren diversos lugares para coñecer a tradición musical de cada sitio. Ademais, aproveitan para interpretar pezas xunto con músicos locais, facendo fusión de temas e estilos.

Na gravación de 'Port' en Galicia intervirán o grupo Leilía e o músicos Anxo Lorenzo, Begoña Riobó, Xabier Díaz, Susana Seivane, Xosé Liz de Cea e Uxía Senlle. A produtora do proxecto, a escocesa Bees Nees, escolleu tres localizacións na contorna de Santiago de Compostela: o pazo de San Lourenzo, a Casa dás Crechas e a Casa Grande de Cornide. O equipo do programa viaxará a continuación a Asturias, onde gravará nos próximos días.

Está previsto que esta serie musical, que se compón de seis episodios dunha hora de duración, sexa emitida a partir do último trimestre do ano na canle irlandesa TG4, na escocesa BBC Alba, na TPA de Asturias e na Televisión de Galicia.