Torra renuncia a presos para desactivar o 155 a un día da moción de censura

O presidente da Generalitat, Quim Torra, asinou este martes 29 de maio un novo decreto de nomeamento de todos os seus consellers e que inclúe catro novos nomes: Laura Borràs (Cultura), Damià Calvet (Territorio e Sustentabilidade), Alba Vergés (Saúde) e Àngels Chacón (Empresa e Coñecemento).

Chacón substitúe en Empresa e Coñecemento a Elsa Artadi, que pasa a ser consellera de Presidencia e mantén a portavocía do Govern que lle designaba o presidente hai días.

Estes nomeamentos fan un Govern máis próximo á paridade de xénero e supoñen substituír aos catro consellers designados inicialmente por Torra que están no cárcere ou no estranxeiro: Jordi Turull (ía ser titular de Presidencia), Josep Rull (Territorio), Lluís Puig (Cultura) e Toni Comín (Saúde).

Torra tamén anunciou que o Govern presentará unha querela por prevaricación contra o presidente do Goberno Mariano Rajoy por impedir a publicación no Diari Oficial da Generalitat (DOGC) do decreto de nomeamentos de consellers no que se incluían aos presos Josep Rull e Jordi Turull e os fuxidos Toni Comín e Lluís Puig.