Cidadáns tamén atrae a militantes do PSdeG

|

A portavoz de Cidadáns en Galicia, Olga Louzao

A portavoz de Cidadáns en Galicia, Olga Louzao 


Os laranxas comparecían ante os medios para presentar os investimentos que din conseguir para Galicia, pero a noticia da posible fichaxe do ex-conselleiro Guerra -e parece que tamén dalgún destacado socialista- converteuse en protagonista.


A portavoz de Cidadáns en Galicia, Olga Louzao, asegurou que o partido laranxa "non pecha portas" a que persoas procedentes de formacións do espectro da dereita e tamén da esquerda sómense ao seu proxecto en Galicia.

SOCIALISTAS, PERO NON PACHI VÁZQUEZ
"En Cs temos o costume de non chamar á porta de ninguén. Moita xente chama á nosa porta e nós non pechamos portas", sinalou este venres Louzao nunha comparecencia de prensa na que recoñeceu que existen "conversacións" para incorporar á formación laranxa a persoas da órbita do Partido Socialista.

Louzao negou que unha destas persoas sexa o exsecretario xeral do PSdeG, Pachi Vázquez. "Que eu saiba non, non está na lista", apuntou, para logo incidir en que existen "moitas conversacións" con persoas ligadas a organizacións "non só da dereita, senón tamén da esquerda".

Nesta liña, remarcou que Cidadáns está "aberto ao talento" e que serán benvidas "todas aquelas persoas" que "veñan con actitude de sumar e achegar" a súa "experiencia profesional" a un proxecto que atravesa "un momento positivo".

PENDENTES DA RESPOSTA DE JAVIER GUERRA
Nunha semana na que se disparou os ruxe-ruxes sobre a posible chegada de Javier Guerra ás filas laranxas, Olga Louzao apuntou que os contactos co exconselleiro de Economía e Industria non foron ocultas "en ningún momento", pero afirma que aínda "non hai unha resposta definitiva por ningunha das partes".

Con todo, sinalou que, en caso de confirmarse a aterraxe en Cs do aínda militante popular, a súa chegada non estaría ligada a "ningún cargo" nin "ningún posto" como posible candidato, ben nas próximas eleccións locais de 2019 ou para as autonómicas, previstas para un ano máis tarde.

"Os regulamentos de Cs fixan de forma moi clara como se pode optar a eses postos", remarcou Louzao, para logo admitir que os contactos con Guerra iniciáronse "a nivel persoal, sen ningún tipo de connotación política" desde a dirección nacional de Cidadáns.

Así mesmo, Louzao remitiuse ás informacións aparecidas nos medios de comunicación sobre a posible incorporación de Guerra, que podería chegar a Cs acompañado por un grupo de militantes populares críticos coa actual dirección do PP de Vigo que encabeza Elena Muñoz, quen venceu ao exconselleiro nas eleccións internas para presidir aos populares vigueses.

"Son decisións persoais de cada un, que deben decidir onde senten máis a gusto", indicou a portavoz de Cs Galicia, que non quixo comentar as declaracións da propia Muñoz ou do presidente provincial do PP de Pontevedra, Alfonso Rueda, que afirmaron que, de confirmarse, a chegada de Guerra a Cs supoñería unha falta de "lealdade".

"Terán que responder eles por que hai afiliados que deixan o partido e veñen ao proxecto de Cidadáns. É a reflexión que teñen que facer eles", afirmou Louzao en relación ás declaracións dos mandatarios populares.

ELECCIÓNS MUNICIPAIS
Así as cousas, Olga Louzao sinalou que o partido laranxa buscará entrar nas corporacións locais das sete cidades galegas nunhas eleccións municipais previstas para o próximo ano que afrontan "cun traballo importante, sen pausa e con moitas ganas".

"Con toda seguridade sumaranse moitas máis persoas ao proxecto de Cidadáns, que está en continua expansión", remarcou, para logo evitar dar nomes sobre posibles fichaxes porque se trata dun "ámbito privado" no que cada persoa deberá "dar resposta cando sexa necesario". 


INVESTIMENTOS GRAZAS A CIDADÁNS

De feito, o motivo inicial da comparencencia de Louzao non era falar de incorporacións, senón dos Orzamentos Xerais do Estado. O partido laranxa presume que  logra que se destinen máis de 3 millóns de euros a Galicia. A formación di que logrou que se “dea luz verde ás catro emendas que presentou aos PGE para mellorar as infraestruturas e a comunicación en Galicia”.


Para a provincia de Pontevedra, saíu adiante, a iniciativa de Cidadáns para remodelar a ligazón de Buenos Aires da AP-9 en Vigo. Louzao comentou sobre a partida orzamentaria asignada a esta actuación que “ascende a un millón de euros". Asímismo, Louzao apuntou que se logrou unha partida económica dun millón de € para a posta en marcha dun servizo piloto de proximidade na liña Coruña-Betanzos, dotando así de sentido á Xerencia de proximidade que RENFE ten en Galicia. 


Na mesma liña continuou sinalando que se incluíu nos Orzamentos Xerais do Estado unha partida específica doutro millón de euros para o desdobramento da N-640 en Lugo (Acceso As Gándaras e novo hospital). A portavoz de Cs comentou ademais, a partida económica de medio millón de euros que será destinada a mellorar a seguridade viaria na estrada N-120 P.K. 560-575 da devandita vía ao seu paso por Ourense.


Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial
Powered by Bigpress