"As medicinas repártense tarde e hai fármacos sen identificar"​

"A pesar de que o persoal da Farmacia traballa a un ritmo frenético, a medicación diaria pautada aos enfermos está a chegar ao seu destino ata con máis de dúas horas de atraso”. Esta é unha das denuncias que se fai desde a Comisión de Centro do CHUAC  para escenificar a "morte" do servizo de farmacia no hospital público da Coruña.

Traballadoras concentráronse primeiro, e manifestáronse despois ao redor do Hospital da Coruña / CIG 

PROTESTA NO CENTRO SANITARIO

Decenas de traballadores saíron ás rúas este venres para alertar da "falta alarmante de persoal para poder atender con eficiencia e garantías" o servizo pese ao constante aumento da poboación ingresada.

Segundo os traballadores, a falta de persoal técnico suficiente ocasiona que "haxa fármacos mal envasados e/ou sen a identificación do número de lote e caducidade". O SERGAS non respondeu por agora ás acusacións.

POSIBLE FOLGA EN FARMACIA

Un dos sindicatos que apoia as protestas, a CIG, informa que haberá mobilizacións todos os venres de maio e é posible que o conflito acabe nunha folga para garantir así "o funcionamento correcto, eficiente e seguro deste servizo".