​Traballadoras de Zara protestarán por despedimentos de eventuais que denunciaron para seren fixas

O conflito laboral polos despedimentos de traballadoras en Zara segue adiante. Así, o sindicato FeSMC-UXT-Comercio convoca para o vindeiro venres, día 11, unha concentración ás 12.00 horas diante da tenda que Zara ten en Santiago na Praza de Galicia.

Protesta diante do Zara de Marineda na Coruña

O obxectivo é “denunciar a política de contratación e os despedimentos nas tendas desta cadea téxtil na provincia da Coruña”. Xa a semana pasada denunciouse esta situación cunha mobilización no centro comercial de Marineda City.

INDITEX GARDA SILENCIO

A central insiste na “fraude na contratación temporal e os despedimentos que están a sufrir o persoal de Zara na provincia da Coruña, empresa buque insignia da multinacional Inditex”. O grupo de Amancio Ortega non respondeu por agora publicamente, a pesar de que Galiciapress solicitou en varias ocasións a súa versión do conflito.

A Sección Sindical de UXT en Zara España S.A. provincia A Coruña detectou que existía "un grupo moi elevado de traballadoras/é con contratos eventuais eternos, desde 2012 e mesmo algún caso 2009”. Segundo a súa versión, a finais de 2016, ao revisar os contratos, “detectamos que eran fraudulentos, contratos eventuais que deberían de ser indefinidos”. O sindicato entende que esta modalidade de “contratos fraudulentos” permítelle ter traballadoras  sen calendarios laborais estables e distintos aos do persoal indefinido, sen vacacións, menor salario, debido a que non acumulan antigüidade (plus de permanencia, 263,4€/ano cada cuadrienio) e sen esixir os seus dereitos por medo a non ser renovado.

A EMPRESA RECOÑÉCEAS INDEFINIDAS PERO DESPÍDEAS

A principios de 2018 a Inspección de traballo instou á empresa para transformar 38 contratos eventuais en indefinidos, ao consideralos fraudulentos . A reacción da compañía foi finalizar contratos que estaban en fraude para evitar transformalos indefinidos, unha "actuación rastrera por parte de Inditex". 

Algunhas mulleres levaron os seus casos á Xustiza. No acto de conciliación “a empresa xa recoñeceu o despedimento improcedente, ofrecendo a indemnización por despedimento que corresponde a contrato indefinido”. A empresa recoñece que son persoas válidas pero prefire despedilas e seguir con contratos precarios, conclúe UXT.