A mineira explotará prata en Touro

|

Atalaya Minning publicou esta mañá o estudo de pre-factibilidad do seu polémico proxecto mineiro en Touro - O Pino.  A multinacional debuxa un escenario moi optimista da explotación de cobre e prata, un negocio redondo en menos anos dos anunciados. 



Lavandeira, de Atalaia Mining, empresa que quere explotar a mina de Touro

Alberto Lavandeira, á esquerda, CEO da mina de Touro, nun pozo de exploración


Unha das principais novidades, polo menos de portas cara fóra, e o plan para explotar prata. Sabíase  da súa presenza en Touro pero ata agora este mineral estivera lonxe do debate sobre o impacto e rendemento da mina. Así, o informe estima a produción de 2,1 millóns de onzas do metal precioso a un ritmo anual de 70.000 onzas en concentrado.


Con todo, o principal foco seguirá sendo o cobre -xa explotado en anteriores épocas- con 392.000 toneladas a un ritmo anual de 30.000 toneladas a partir de "concentrados de alto grao moi limpos". 


Outra novidade sobre os datos coñecidos ata agora é o calendario previsto. Falábase dunha operación de 25 anos, pero o informe sinala "dous anos de desenvolvemento e 12 anos de operación". 


Os datos públicos tamén destacan o "baixo custo das operacións" cun "fluxo de ingresos medios procedente da produción comercial de 60 millóns de dólares ao ano" cun "fluxo de ingresos total" de 489 millóns.  


Para acometer o proxecto, a mineira estima un custo global de 165 millóns, pero será necesaria unha ampliación de capital aos oito anos da posta en funcionamento. A empresa espera captar entón 30 millóns a maiores.


"A principal conclusión deste informe é que o proxecto de Touro é rendible desde o actual escenario de avaliación" di o documento. Alberto Lavandeira, responsable da industria, presume que "o resultado exitoso deste estudo é un fito significativo para Atalaya e valida o noso interese inicial no proxecto". 


Os investidores acolleron con entusiasmo o anuncio. "Excelente o informe de actualización do Proxecto Touro desta mañá. Barato de conseguir, barato de construír, simple de extraer e cobre de baixo custo", escribiu un dos expertos bolsistas nun foro especializado.


Todas as cifras desta información están expresadas en dólares de EE.UU.




relacionada Veciñanza de Touro e O Pino pide a Medio Ambiente que analice os residuos que se verten na mina
relacionada A mina de Touro contrata a un cargo do PP

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress