Veciñanza de Touro e O Pino pide a Medio Ambiente que analice os residuos que se verten na mina

Vertedoiro na Mina de Touro

A veciñanza dos municipios de Touro e O Pino indica, a través da Asociación Aldea Viva, que está farta dos residuos. "Desde residuos de ENCE, a contedores de chapapote do Prestige, residuos urbanos e vertedoiro municipal, ou ata o intento de enterrar reses mortas durante a crise das vacas tolas. Os terreos da antiga mina de Touro parecen dar cabida a todo aquilo que noutro sitio non interesa", denuncian. 

Ante a constante filtración ao chan destes materiais en época de choiva e os cheiros permanentes que levan, as asociacións remitiron un escrito á Consellería de Medio Ambiente, para que pida á empresa Tratamentos Ecolóxicos do Noroeste S.L (TEN) "e aos demais operadores a documentación que acredite, a través dos seus libros e rexistros, os residuos que depositaron na zona". 

As habitantes declaran que "segundo os propios datos das empresas, estas reciben miles de toneladas de residuos", e ante as denuncias que se están recibindo, esixen á Administración Ambiental que inspeccione a zona de vertedura e que, se fose o caso, aplique "o réxime sancionador da Lei 26/2007 de Responsabilidade Ambiental e cos principios de 'quen contamina, paga'".

Contedores do Prestige na Mina