Debe Navantia Ferrol construír barcos de guerra para Arabia Saudita?

España logrou pechar un importante acordo de armamento durante a visita do príncipe herdeiro saudita, Mohamed Bin Salman, esta semana. Facía dous anos que estaba pediente a firma da venda de cinco corvetas que construirá Navantia nos estaleiros de Ferrol e Cádiz.

@NavantiaOficial firma un acordo para crear unha empresa conxunta con Arabia Saudita
O noso Presidente, Esteban García Vilasánchez, destaca o claro compromiso alcanzado por ambos os gobernos para a consecución do contrato para a construción de 5 corvetashttps://t.co/jsKdUBsj7F pic.twitter.com/tQeu7OXLJd

— Navantia Oficial (@NavantiaOficial) 13 de abril de 2018

As cifras que enarboran os defensores do contrato son importantes: 2.000 millóns de investimento e 6.000 postos de traballo directos para unhas zonas moi necesitadas de emprego.

Tamén é certo que Arabia Saudita encabeza as clasificacións de países con menos respecto polos dereitos humanos. A monarquía que na práctica xa dirixe o príncipe herdeiro lidera ademais unha coalición que mantén aberta unha guerra en Iemen, na que millóns de persoas sofren fame e desprazamentos.

Así as cousas debe España proporcionar armas á familia Saud? Arabia Saudita mantén un bloqueo sobre Iemen, usando barcos de guerra como os que construirá Navantia, que é un dos factores que explica a fame. 

ESQUERDA UNIDA OPONSE NO CONGRESO

En opinión de Esquerda Unida non debe facelo. O seu líder Alberto  Garzón censurou que España siga vendendo armamento a países que non só "non respectan os Dereitos Humanos", senón que está inmersos nun proceso bélico no que se asasina "de forma indiscriminada" a miles de persoas en Iemen.

Segundo denunciou Garzón, o actual xefe do Estado continúa "as mesmas políticas gravosas" que o seu pai fomentando as relacións con ditadores que permiten proporcionar armas a países como Arabia Saudita, que "as utilizan contra a poboación civil" e "en contra cos Dereitos Humanos". "Non queremos (desde EU) ser responsables diso e desde aquí dicimos 'non no noso nome'", salientou.

De entrada, tanto Garzón como o seu compañeiro de EU Miguel Ángel Bustamente rexistraron unha batería de preguntas no Congreso pedindo contas ao Goberno sobre esta venda "millonaria" de barcos de guerra ao réxime saudita.As cinco corvetas Avante 2200 que Navantia construirá nos estaleiros de Ferrol e Cádiz para vender a Arabia Saudita, cuxo contrato se negocia desde 2015, ocupará anualmente a preto de 6.000 traballadores directos e indirectos durante cinco anos, segundo informou Navantia nun comunicado. Trátase dunha operación valorada nuns 2.000 millóns de euros.

DETALLES DO CONTRATO

Navantia asinou o xoves un acordo coa empresa estatal saudita Saudi Arabian Military Industries (SAMI) polo que ambas se comprometen a crear unha empresa conxunta en Arabia Saudita que fornecerá e integrará os sistemas de combate para os futuros contratos de programas navais no país árabe, comezando polo contrato das cinco corvetas españolas, en negociación desde 2015.

O presidente de Navantia, Esteban García Vilasánchez, asegurou que a construción das cinco corvetas terá "un elevado impacto na economía e o emprego", xa que calcula que empregará anualmente a ao redor de 6.000 persoas, dos que máis de 1.100 serán empregos directos, máis de 1.800 corresponderán a postos de traballo da IIAA de Navantia e máis de 3.000 serán empregos indirectos xerados por outros subministradores.

Ademais, celebrou que Arabia Saudita manifestou un "claro compromiso" co contrato con Navantia para a construción en España das Avante 2200."O acordo asinado entre os dous gobernos demostra este compromiso e impulsa aínda máis a pronta firma deste contrato", sinalou. Pola súa banda, os ministros de Defensa de ambos os países expresaron a súa intención de completar e facilitar os procedementos necesarios para asinar o contrato con Navantia para a construción das corvetas.

García Vilasánchez tamén destacou que a creación dunha empresa conxunta supón "unha oportunidade excepcional" para posicionar os sistemas integrados e solucións tecnoloxicamente avanzadas de Navantia no mercado de Arabia e a súa área de influencia, que ademais está aliñada coa súa estratexia de internacionalización.