Varios tornados afectan a Galicia pola cicloxénese explosiva Hugo

Os municipios de Cambados (Pontevedra) e Cee (A Coruña) sufriron danos na tarde deste venres como consecuencia de senllos tornados, e un raio caeu na madrugada sobre un edificio da localidade coruñesa de Miño, segundo informou o servizo de emerxencias do 112 Galicia

O primeiro tornado tivo lugar en Cambados. Rexistrouse ao redor das 18,25 horas deixando danos materiais en dous tellados, no lugar da Xesteira. Ademais, o forte vento provocou que caesen varios cables na estrada.

Efectos do tornado en Cambados nunha foto dos servizos de emerxencias

Un particular alertou do sucedido ao 112 Galicia e, no momento en que se recibiu o aviso, desde o CIAE informouse do ocorrido á Policía Local e Protección Civil.

Outro tornado, ao redor das 19,10 horas, no municipio de Cee, na zona de Brens, na rúa de Camiños Chans, provocou tamén danos materiais. Segundo puido saber o 112 Galicia, arrincou un tellado, danou un farol e desprendeu parte do peche dunha leira.

O 112 Galicia tivo constancia dos feitos a través da Policía Local ás 19,10 horas. Enseguida, desde o CIAE pasouse o aviso aos Bombeiros de Cee e a Protección Civil.

Segundo informa o Consorcio Provincial contra incendios da Coruña, procedeuse á retirada do farol, a sinalización da posible caída do peche da cancha polideportiva e á limpeza dos cristais.

UN RAIO PROVOCA DANOS NUN EDIFICIO EN MIÑO
Por outra banda, un raio caeu durante a noite do venres ao sábado sobre o tellado dun edificio de tres plantas en Miño e provocou danos na cuberta superior do inmoble. Segundo os datos facilitados ao 112 Galicia, o raio arrincou unha parte do teito pero, afortunadamente, ningunha persoa resultou ferida.

Os feitos ocorreron en Galea, á altura do número 24, ao redor das 01,30 horas. Nese momento, un particular púxose en contacto co 112 Galicia para dar conta do sucedido.

Acto seguido, desde o Centro Integrado de Atención ás Emerxencias (CIAE) 112 Galicia pasouse o aviso á Garda Civil, aos Bombeiros de Betanzos e a Protección Civil.