Manifestación pola equiparación de salarios entre os policías

A asociación que impulsou a demanda de equiparación salarial coas policías autonómicas e a Policía foral de Navarra, Xustiza Salarial Policial (Jusapol), mantén a manifestación convocada en Lugo para o 20 de marzo baixo o lema 'Mesmo traballo, mesmo salario'.

A garda civil de Lugo Laura Teijeiro incidiu en que o que perseguen con mobilizacións como esta "é a equiparación real", que non se recolle no acordo subscrito entre o Ministerio do Interior con sindicatos policiais e asociacións da Garda Civil.

Por iso, manteñen a convocatoria de manifestación na cidade amurallada para o próximo 20 de marzo, a partir das 17,00 horas con saída desde a Praza Maior de Lugo e remate na Mosquera, na Rolda da Muralla.

Así mesmo, reivindican tamén "dignidade salarial e profesional", que non se plasma nese acordo co Ministerio do Interior. Outro dos integrantes en Lugo de Jusapol, o axente da Policía Nacional Pedro Rodríguez, explicou que esta asociación "nace" na Comisaría de Palencia, hai un ano, "en vista que os sindicatos e asociacións da Garda Civil non conseguiron a equiparación tan buscada desde fai trinta anos".

Tamén puntualizou que Jusapol "non ten ningunha cor política, nin hai ningún sindicato detrás". "É algo que naceu de forma espontánea entre policías e gardas", abundou.

Nesta liña, recoñece que o acordo co Ministerio vai redundar nunha "subida substanciosa", pero "non" chega á "equiparación salarial" á que aspiran como asociación.