As casas e leiras de Sito Miñanco en Galicia

A Audiencia provincial de Pontevedra está a xulgar a Sito Miñanco e os seus familiares por branqueo de capitais. A Fiscalía pide a disolución dunha inmobiliaria que comprou numerosísimos inmobles con diñeiro procedente, presuntamente, do narcotráfico. Analizamos o valor e localización deste enorme imperio de casas e leiras, por valor de máis de 4 millóns.


|

A Audiencia provincial de Pontevedra está a xulgar a Sito Miñanco e os seus familiares por branqueo de capitais. A Fiscalía pide a disolución dunha inmobiliaria que comprou numerosísimos inmobles con diñeiro procedente, presuntamente, do narcotráfico. Analizamos o valor e localización deste enorme imperio de casas e leiras, por valor de máis de 4 millóns.


Moito deu de que falar durante os últimos días José Ramón Prado Bugallo, tamén coñecido como Sito Miñanco, o narcotraficante que dispón dun considerable imperio a través da inmobiliaria de Cambados San Saturnino.


Sito Miñanco senta no banco dos acusados por branqueo


Xulgado agora por un delito de branqueo de capitais procedentes do negocio da droga, a súa presunta rede de negocios foi definida pola Policía Nacional como "unha das estruturas narco-criminais máis potentes a nivel mundial", e a operación que concluíu na súa detención chegou a incautar máis de 4.000 quilos de cocaína.


No xuízo que empezou onte na Audiencia Provincial de Pontevedra, Sito Miñanco nega os cargos dos que lle acusan, e polos que a Fiscalía pide seis anos de prisión e unha multa de 10 millóns. Unha condena que busca penar o suposto branqueo de capitais co que José Ramón Prado Bugallo, co auxilio da súa ex-esposa e cuñada, chegou a amasar unha inconmensurable cantidade de propiedades e fortuna.


O IMPERIO DE SITO MIÑANCO


Os inicios do seu imperio, de acordo ao escrito de acusación de a Fiscalía, remóntanse a 1988, cando Sito Miñanco adquiriu un piso na rúa Benito Corbal de Pontevedra, cun valor de mercado por aquelas datas de 64.282,40 euros. Ese mesmo ano, Inmobiliaria San Saturnino comprou unha leira rústica denominada “Con de Xido” en O Facho polo prezo de 980.000 pesetas, ao redor de 5.880 euros. Sobre esta vivenda inscribíronse dúas obras novas, cun valor de 180.000 e 30.000 euros respectivamente. O valor de mercado da referida propiedade, na data da súa adquisición, era de 228.503,78 euros, e o seu aluguer constituíuse como unha das principais fontes de ingreso da inmobiliaria a nome da filla de Sito Miñanco.


Un ano máis tarde, inscribiu no Rexistro da Propiedade de Cambados a escritura de de división horizontal dun edificio de  Avenida de Galicia e de Hospital de Cambados. Sito Miñanco adxudicouse desta maneira numerosos pisos e vivendas, cuxo valor de mercado total ascendía aos 931.955 euros. O seu aluguer compuxo outra das enormes fontes de ingreso do condenado narcotraficante.


Chegan os 90, e a principios de década Sito Miñanco repite xogada: outra leira do mesmo lugar e co mesmo nome, cun valor de mercado de ata 33.584 euros. Seis anos máis tarde, en 1996 e sendo a partir dese momento administradora única a súa ex-muller, unha leira da urbanización O Rial en Vilagarcía sumou 101.768 euros de valor de mercado e 90.000 euros de prezo de adquisición.


A finais de século, entre o 98 e o 99, a inmobiliaria fíxose coa propiedade de numerosas leiras rústicas: “Prado do Monte de Salgueiros”, en O Facho, por 850.000 pesetas pero cun valor de mercado de 60.732 euros; “Pradeira de Abaixo”, tamén en O Facho e valorada en 25.737 euros; outra “Con de Xido” e “Asento de casa”, dúas leiras de Cambados que suman 264.963 euros; e por último a leira “Prado de Areas”, na parroquia de Adigna en Sanxenxo, cun valor de mercado de 167.798 euros.


Inmobiliaria San Saturnino, cuns ingresos declarados de 105.071,50 euros e uns gastos declarados de 129.103,60 euros, adquiriu en 2002 outra leira en Sanxenxo, chamada “Revolta”, cun valor de compra de 29.500 euros pero un valor de mercado de 56.447 euros. A ela sumaríanse unha praza de garaxe e un trasteiro na rúa Ourense de Sanxenxo, en valor de 22.033 euros.


2003: UN ANO CLAVE


Un ano máis tarde a inmobiliaria, cuns ingresos declarados de 123.453 euros e uns gastos de 384.447,40 euros, exerceu unha serie de adquisicións por un importe escriturado de 312.210 euros, aínda que o valor de mercado naquela data da totalidade das compras efectuadas alcanzou a friorenta de 1.110.321 euros: tres leiras rústicas na parroquia de Adigna en Sanxexo,ás que se sumaron outras 25, aínda que só solicitouse a inscrición de dez delas; outras nove leiras das que só se inscribiu a chamada “Pradocelo”; unha vivenda en cálea Doutor Loureiro Crespo en Pontevedra, así como o seu trasteiro; e outras dúas leiras en O Facho, en Cambados. Nun principio, para facer fronte a estas cantidades só se solicitou financiamento alleo, mediante a constitución de hipotecas, por un importe de 300.000 euros.


En 2004, Sito Miñanco declarou a obra que realizou sobre unha das súas leiras en Cambados, a construción de unha nave destinada a lavado e engrase de automóbiles, e cuxo valor de mercado foi de 222.060 euros e que despois sería alugada, outorgando outra das fontes de ingresos do presunto narcotraficante.


Non foi ata 2007 cando a inmobiliaria de Sito Miñanco volveu comprar inmobles, nesta ocasión unha casa de planta baixa en Hospital de Cambados, cun valor de mercado de 397.313 euros e cun precio de adquisición de 480.000 euros.


ACUSACIÓNS CONTRA A FAMILIA DE SITO MIÑANCO


Algúns dos familiares de Sito Miñanco, por outra banda, tamén foron acusados de beneficiarse deste suposto branqueo de capitais á hora de adquirir vivendas. A irmá da ex muller do delincuente e socia fundadora da inmobiliaria, adquiriu dous baixos dun edificio situado en Adigna, Sanxenxo, por un valor de mercado de 139.608 e 132.256 euros respectivamente.


Tamén comprou un local comercial na Rúa Viña dá Fonte de Sanxenxo, cun valor catastral de 31.128 euros, e dunha casa situada na circunvalación entre Portonovo e Sanxenxo, de 67.761 euros.


A filla maior de Sito Miñanco, doutra banda, adquiriu en 2001 a leira “Prado de Pradocelo” en Sanxenxo, unha batea situada no polígono de Cambados para cultivo de ostra plana e vieira por un prezo de 18.535 euros e unha praza de garaxe do porto náutico de Sanxenxo en valor de 20.880 euros.


De acordo a Fiscalía, os ingresos de ambas non xustificarían de ningunha maneira a posibilidade de adquirir todos estes inmobles, polo que quedan acusadas  de participar na construción deste enorme imperio usando o dienro obtido ilicitamente.

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE