Así será a nova Berlingo que Citroën está a piques de presentar

A firma automobilística francesa Citroën desvelará en primicia mundial durante o próximo Salón Internacional do Automóbil de Xenebra a terceira xeración do seu vehículo comercial Berlingo, que se fabrica na planta do Grupo PSA en Vigo e lanzarase no segundo semestre do ano, segundo informou a empresa nun comunicado.

Citroën destacou que o novo Berlingo convértese no sexto lanzamento que fai a marca do dobre chevron nos últimos dous anos, como parte da renovación da gama que está a levar a cabo, a través de modelos co ADN da marca e que "teñen un deseño característico e un elevado confort".

Así, o novo Berlingo será o principal protagonista da caseta de máis de 1.100 metros co que contará a empresa no Salón de Xenebra, debido a que "agora progresa en modernidade, así como en deseño e confort e adopta os elementos de identidade do estilo de Citroën".

PRESTACIÓNS NOVO BERLINGO

O modelo, que conta cunha nova plataforma, dispón de 19 tecnoloxías de axuda á condución e tamén de catro de conectividade, así como de novas motorizacións de última xeración e suspensións orientadas ao confort. Este vehículo ofrécese con dúas lonxitudes, ambas  con opción de cinco ou sete prazas.

Doutra banda, a corporación francesa tamén exhibirá en Xenebra o novo C4 Cactus, que se produce en Madrid, e que fará, desta maneira, a súa primeira aparición nun salón internacional. Este modelo estrea en Europa a suspensión de Amortiguadores Progresivos Hidráulicos, que emulan o efecto 'alfombra voadora'.

NOVOS NOMES PARA O PICASSO

Doutra banda, a compañía, coincidindo coa chegada da nova caixa automática EAT8 á gama, renomeou os seus modelos C4 Picasso e Grand C4 Picasso, que pasan a denominarse C4 SpaceTourer e Grand C4 SpaceTourer.

A intención da empresa automobilística é reagrupar baixo una mesma denominación produtos "modernos e complementarios" que permiten viaxar a grupos de persoas formados por entre cinco e nove membros.

A caseta da compañía na próxima feira automobilística tamén contará, á súa vez, coa presenza do C3 e do C3 Aircross, este último móntase na planta de Figueruelas. A firma indicou que o C3 rexistra xa máis de 300.000 unidades vendidas, mentres que o C3 Aircross "seduciu" a 50.000 persoas.