​Profesionais non europeos para o SERGAS a pesar da emigración dos galegos

Na actualidade, para traballar no SERGAS ou na maioría das Administracións, como así se recolle nas convocatorias das Ofertas Públicas de Emprego, é requisito de acceso ser do Estado español ou de calquera dos estados membros da UE. Na Sanidade pública galega isto podo cambiar pronto.

O PPdeG presentou no Proxecto de Lei polo que se modifica a Lei de Saúde unha proposta coa intención de permitir a entrada no sistema público de médicos e médicas alleos ao espazo europeo. Unha proposta curiosa neste momento, dado que Galicia exporta persoal sanitario, por exemplo moitas enfermeiras ao Reino Unido, debido á boa formación universitaria e ás precarias condicións do sector. Como ten maioría absoluta, probablemente sairá adiante.

O plan dos conservadores desatou o nerviosismo entre os sindicatos sanitarios. Por exemplo, a secretaria nacional da CIG Saúde, María Xosé Abuín, asegura que “non cuestionamos a súa formación, nin a súa competencia profesional. O que si advertimos é que o PP, deste xeito, en lugar de garantir condicións dignas para as/os médicas/os do SERGAS, independentemente da súa nacionalidade, pretende contar cunha bolsa de profesionais como man de obra barata no sistema sanitario”.

A central entende que con esta matización o PP “está a recoñecer que o persoal actual do sistema sanitario público é insuficiente e que é necesario abordar esta situación”, di Abuín, quen engade que “desde a CIG-Saúde defendemos o dereito ao traballo de todas as persoas, independentemente de onde nazan, mais queremos denunciar a hipocrisía do PP porque non busca persoal en condicións dignas, senón institucionalizar esas formas de contratación precarias pensando que o persoal que vén de fóra da UE está máis en disposición de aceptalas. Un abuso en toda regra”.