Dous accidentes obrigan a cortar a A-6 á altura de Baralla

A A-6, ao seu paso polo municipio lucense de Baralla, rexistrou a pasada noite dous accidentes con varios feridos nun curto período de tempo, que obrigaron a cortar a vía durante a noite.

Tal e como confirmou o 112 Galicia, o primeiro aviso chegou ás 20.45 horas, por un vehículo que chocou co lateral da vía no quilómetro 461 da A-6.

Ao redor de cinco minutos máis tarde rexistrouse un segundo accidente no mesmo punto, entre un vehículo articulado e un turismo. Nel, segundo amplía a Garda Civil, rexistráronse varios feridos, entre eles o condutor do camión, aínda que "non se teme pola súa vida".

Até alí desprazáronse as Urxencias Sanitarias, os Bombeiros de Sarria e a Garda Civil. A vía foi cortada en ambas as direccións -- A Coruña e Madrid -- desde as 21.00 horas até as 8.00 horas da mañá deste sábado.

Durante o tempo no que permaneceu a vía pecha o tráfico foi desviado pola N-6.