Pronostícase unha demora ata 2021 no social pola folga de Xustiza

O presidente do Consello da AvogacíaGalega, Félix Mondelo, alertou de que coa folga dos empregados de xustiza, que suma sete días, a demora no xulgado do social de Lugo pode levar a señalamientos a 2021. 

O tamén decano do colexio de avogados de Lugo lembra que xa neste xulgado do social citábase para dous anos, pero este atraso verase "superado" polo paro indefinido convocado polo colectivo de funcionarios e persoal laboral.

Nos outros xulgados, estima que os señalamientos van sufrir dilacións de "ata un ano", un prazo que pode verse ampliado se persiste o paro de funcionarios. "Están a aprazarse xuízos. O calendario xa está completo para este ano e o ano que vén tamén a axenda está completa. Nalgún xulgado esa demora pode chegar a dous anos", subliñou. 

Por todo iso, pediu ás partes en "conflito" que "suavicen" as posturas. "Se son lexítimas as peticións dos funcionarios, eles tamén teñen que comprender cales son os orzamentos que ten a administración para poder atender as súas necesidades. Como en todo diálogo, o que se trata é de ceder por ambas as partes ata chegar a un termo razoable que permita unha solución, porque se está prexudicando notablemente a todos os cidadáns e a todos os profesionais", reflexionou.