O exmozo de Déborah Fernández deberá achegar outra mostra de ADN
É o único investigado pola morte da moza de Vigo e por agora non se opuxo a que se analice o seu código xenético. A Xustiza aproba a nova análise pero denega outras actuacións que reclama a familia da falecida.
A xuíza de instrución número 2 de Tui (Pontevedra) acordou aceptar a petición dos avogados da familia de Déborah Fernández de tomar unha nova mostra de ADN a Pablo P.S.L., exmozo da moza viguesa, e único investigado en relación coa súa desaparición e morte.
A toma de material xenético do investigado ten como finalidade a súa comparación cos restos achados no cadáver da moza, e non é a primeira vez que se lle toma unha mostra de ADN ao exmozo (a primeira vez foi en 2002, cando a moza aínda estaba desaparecida, e a segunda en 2010).
PROBLEMAS NOUTRAS MOSTRAS
Os avogados sinalaron que a primeira mostra tomada "non consta" de forma fehaciente que sexa do investigado, nin están claras as circuntanscias nas que se fixo esa dilixencia. Con respecto á 2010, "nin sequera hai resultados", é dicir, entenden que non se chegou a analizar.
En todo caso, a representación procesual da familia da moza advertiu de que recorrerá esa resolución do xulgado, xa que a maxistrada non accedeu a que esta parte estea presente durante a toma da mostra. Os letrados da familia denunciaron trátase de "un novo insulto" e un "desprezo".
Con todo, o xulgado opúxose á práctica doutras dilixencias, como unha pericial conxunta de todos os expertos (das forzas policiais e dos técnicos prouestos polos avogados das partes) que participaron na análise do disco duro do computador de Déborah Fernández.
A xuíza si aceptou a declaración do experto forense Aitor Curiel, que o pasado 8 de xuño ratificou por vídeoconferencia o informe no que concluíra que a etiliogía da morte da moza é homicida.
Escribe o teu comentario