Case un morto á semana: o accidente mortal de tractor no Porriño é o quinto esta primavera

O tractor matou de novo o xoves. Un veciño de 57 anos do Porriño perdeu a vida na parroquia de San Salvador de Budiño despois de que o vehículo agrícola que conducía envorcase e atrapáseo debaixo. Foi un veciño quen chamou ao 112 Galicia ao redor das 19:40 horas para dar a alarma. Os servizos de Urxencias Sanitarias, os bombeiros do Porriño, a Garda Civil e Protección Civil desprazáronse até o lugar, pero xa non había nada que facer. A vítima era a máis nova de entre as documentadas en 2026, nun ano que volve confirmar que a sinistralidade mortal con tractores en Galicia non dá sinais de remisión.

Este accidente súmase ao rexistrado o 24 de abril en Viana do Bolo (Ourense), onde un home faleceu ao quedar atrapado baixo unha das rodas do seu tractor nun camiño de terra da localidade de Bouza. Apenas dúas semanas antes, o 10 de abril, outro agricultor morreu en Arzúa ao ser inmobilizado entre o vehículo e unha árbore mentres cortaba leña na zona de Bosende. E o 9 de abril, un home perdeu a vida en San Cosme de Liñares, na Pobra do Brollón (Lugo), en circunstancias similares. O primeiro dos casos documentados nos últimos dous meses foi o do 30 de marzo, en Vilamartín de Valdeorras (Ourense), onde outro traballador faleceu nunha parcela do lugar de Córgomo.

Cinco mortos en menos de dous meses nos que a xeografía galega —Lugo, A Coruña, Pontevedra e Ourense— fai de mapa da dor. Non hai ningunha provincia a salvo.

Os datos que manexan o 061 e a Consellería de Medio Rural sitúan a Galicia nun lugar que ninguén envexaría: a comunidade acumula máis do 38% dos accidentes mortais con tractor de todo o Estado, cunha cifra que na última década suma 184 falecidos, é dicir, entre 15 e 20 vítimas anuais de media. O ano 2024 pechou con 17 mortos no punto do sinistro, tras atender o 061 un total de 68 accidentes e asistir a 72 persoas. En 2025, os números empeoraron en número de sinistros —115— aínda que os falecidos no acto baixaron lixeiramente até 16. A tendencia estrutural, en calquera caso, mantense inquietantemente estable e sen sinais claros de mellora.

Para entender a dimensión do problema convén comparalo con outro referente da sinistralidade viaria: os accidentes de tráfico cóbranse en Galicia unhas 100 vidas ao ano. Os tractores, que non representan nin de lonxe o 20% do parque móbil galego, xeran mortes a un ritmo que duplica, polo menos, o dos turismos en proporción á súa presenza nas estradas e pistas do rural.

Os vehículos agrícolas son responsables de case o 70% dos accidentes mortais do sector primario galego. Unha porcentaxe que só pode entender ao examinar as circunstancias en que ocorren estes sinistros: máis do 60% implican un envorco, e en oito de cada dez deses casos ou faltaba a estrutura de protección homologada ou o cinto non estaba a ser utilizado no momento do accidente.

O perfil da vítima

Se hai un trazo que define con exactitude a quen mata o tractor en Galicia, ese é a idade. O 90% dos falecidos ten máis de 65 anos, o que apunta directamente ao envellecemento do rural galego e a un parque de maquinaria que envellece cos seus propietarios. Moitas das máquinas que circulan hoxe polas pistas e leiras da comunidade carecen dos sistemas de seguridade que a normativa actual esixe nos vehículos modernos: barras antivuelco, cintos e proteccións na toma de forza son elementos ausentes nunha proporción elevada dos tractores en uso. Os accidentes de Viana do Bolo, A Pobra do Brollón ou Arzúa responden a este patrón: maiores traballando sós, en terreos con pendente, con maquinaria antiga.

A orografía galega agrava o risco. O terreo irregular, os camiños estreitos e as ladeiras de monte crean condicións obxectivamente perigosas para a condución de vehículos de gran peso e centro de gravidade elevado. Cada accidente reúne varios destes factores.