A Xunta considera pechado o conflito con Ambulancias do Atlántico e finaliza a intervención no servizo de Vigo
A publicación no Diario Oficial de Galicia da resolución na que deixa sen efecto a intervención dos contratos de servizo de transporte sanitario da área olívica pecha, a priori, o capítulo deste conflito que puxo contra as cordas a asistencia sanitaria. No entanto, cabe dicir que a Xunta tardou moito en admitir a intervención do servizo.
O Diario Oficial de Galicia (#DOG) publica este mércores a resolución pola que se deixa sen efecto a intervención dos contratos de servizo de transporte sanitario da área de Vigo, tras haber licitado e adxudicado os novos contratos.
En maio deste ano, "ante a grave perturbación constatada na prestación do servizo de transporte sanitario urxente e non urxente na área sanitaria de Vigo" por parte da concesionaria, Ambulancias do Atlántico, acordouse intervir os contratos do servizo "coa finalidade de asegurar o axeitado mantemento e funcionamento deste servizo esencial".
Así, en xuño acordouse que a empresa pública Tragsa encargaríase do apoio técnico e administrativo na xestión desta intervención. Nesa resolución establecíase unha duración inicial do encargo de 6 meses, sen prexuízo de que o encargo perdería a vixencia se a intervención finalizaba antes de devandito prazo.
"Debido á persistencia no incumprimento na prestación dos servizos, procedeuse á resolución dos respectivos contratos de servizo de transporte sanitario urxente e non urxente, e á súa posterior licitación e adxudicación", recolle o DOG deste mércores.
Deste xeito, a resolución dos contratos implica a finalización da intervención acordada en maio, que queda sen efecto.
Escribe o teu comentario